सुडानमा साना बालबालिका पढ्ने एउटा किन्डरगार्टनसहितका ठाउँमा आक्रमण हुँदा ४६ बालबालिकासहित एक सय १६ जनाको मृत्यु भएको छ ।
एक प्रि-स्कूल अर्थात् किन्डरगार्टनसहित कालोगी शहरका अस्पताल र सरकारी भवनहरूमा भएका आक्रमणमा ४६ बालबालिकासहित एक सय १६ जनाको ज्यान गएको सुडानी सेनालाई उद्धृत गर्दै समाचार संस्था अलजजीराले जनाएको छ ।
यो आक्रमण अर्धसैनिक समूह ‘र्यापिड सपोर्ट फोर्सेस’ (आरएसएफ) ले गरेको सुडानको डक्टर्स नेटवर्क र सेनाले जनाएका छन् । आरएसएफले भने यस सम्बन्धमा प्रतिक्रिया दिएको छैन ।
इस्लामिक कट्टरपन्थी अर्धसैनिक समूह आरएसएफले शुक्रवार डार्फर क्षेत्रमा सुडानी सेनाले ड्रोन आक्रमण गरेको आरोप लगाएको छ ।
सुडानमा सन् २०२३ को अप्रिलदेखि आरएसएफ र सेनाबीच सत्ता सङ्घर्ष चलिरहेको छ । दुवै पहिला एकअर्काका सहयोगी भएकामा अहिले एकअर्कालाई सिध्याउन प्रयास गरिरहेका छन् ।
