खाडीमा आफन्तलाई बन्धक बनाएको भन्दै झापामा रहेका श्रीमती र भिनाजुसँग करिव तीन लाख ठगी भएको घटना सार्वजनिक भएको छ ।
घटना नं १- कतारमा रहेका श्रीमान आफ्नो कब्जामा रहेको र उसलाई प्रहरीले पक्राउ गरी कार्वाही गर्न सक्ने डर देखाउँदै झापामा रहेकी श्रीमतीलाई अज्ञात व्यक्तिबाट म्यासेज आयो । ५ लाख रुपैयाँ दिनु नत्र तपाईको श्रीमानको ज्यान खतरामा भनेपछि श्रीमती आतिइन् । श्रीमानलाई फोन गर्दा तत्काल नलागेपछि डराउँदै उनले ठगले दिएको खातामा २ लाख ३७ हजार रुपैयाँ जम्मा गरिन् । पछि बुझ्दा उनका श्रीमानलाई त्यस्तो केही पनि भएको रहेनछ ।
घटना नं २- खाडीमै रहेका सालोको ज्यान खतरामा रहेको भन्दै झापा निवासी उनका भिनाजुलाई त्यसरी नै अज्ञात व्यक्तिबाट म्यासेज आयो । उनीसँग ८० हजार भारु मागिएको थियो । सालोलाई जोगाउन भन्दै भिनाजुले ४८ हजार रुपैयाँ खातामा हालिदिए । पछि थाहा भयो कि उनी पनि ठगीमा परेछन् ।
यी केही उदाहरण मात्र हुन् । झापामा यस किसिमको ठगी बढ्दै भएपछि प्रहरीले सार्वजनिक सूचना जारी गरी आमसर्वसाधारणलाई सचेत गराएको छ । रोजगार तथा अन्य कामको सिलसिलामा विदेशमा रहेकाहरुको परिवार, आफन्त र साथीभाइहरुलाई ह्वाट्सएपलगायतका बिभिन्न सामाजिक सञ्जाल, फोन तथा म्यासेजमार्फत सम्पर्क गरी विदेशमा रहेका तपाईको आफन्त आफ्नो कब्जामा रहेकोले पैसा नदिए ज्यान लिने धम्की दिने त्यस्तै दुर्घटनामा परेकाले तत्काल उपचार गर्न पैसा चाहिने वा प्रहरीले पक्राउ गरी जेल हाल्न लागेकोले छुटाउन पैसा चाहिने जस्ता त्रास देखाएर ठगी गर्ने क्रम बढेको जिल्ला प्रहरी कार्यालय झापाका सूचना अधिकारी डीएसपी खगेन्द्र खड्काले बताए ।
उनले त्यस किसिमको ठगीको एकपछि अर्को गर्दै उजुरी पर्दै गएको बताउँदै बिभिन्न ठगी गर्ने गिरोहहरु सक्रिय रहेकाले सजग रहन सबैलाई अनुरोध गरेका छन् ।
यस्ता किसिमका फोन तथा म्यासेज प्राप्त भएमा प्रहरी कन्ट्रोल रुम १०० मा डायल गरी जानकारी दिन वा नजिकको प्रहरी कार्यालयमा सूचित गर्न उनले अनुरोध गरेका छन् । यसरी ठगी गरेका घटनाका सम्बन्धमा अनुसन्धान भइरहेको उनले जानकारी दिएका छन् । प्रतिदिन दैनिकबाट
