झापाको ऐतिहासिक एवं धार्मिकस्थल गरामनीको दुर्गा शक्ति पीठमा घटनास्थापनाका दिनदेखि श्री पद्म महापुराण ज्ञान महायज्ञ सुरु भएको छ ।
दुर्गा शक्ति पीठ मन्दिर संरक्षण समिति सचिव तथा पुराण मूल आयोजक समितिका अध्यक्ष नवराज भट्टराईको अध्यक्षतामा भएको महायज्ञको जगद्गुरु बालसन्त मोहनशरण देवाचार्यले समुद्घाटन गरेका हुन् ।
कार्यक्रममा बोल्दै जगद्गुरु देवाचार्यले १८ पुराणको महत्वबारे प्रकाश पारेका थिए । महायज्ञ असोज २५ गते घटस्थापनादेखि ३१ गते सप्तमीसम्म सञ्चालन हुने छ ।
दुर्गा शक्ति पीठ मन्दिर संरक्षण समितिका उपाध्यक्ष जयकुमार प्रसाईंले स्वागत गरेको कार्यक्रममा बिर्तामोड-७ का वडाध्यक्ष कृष्णप्रसाद खरेल अविरल, सामाजिक कार्यकर्ता पूर्व कर्नेल डीबी थापा र आचार्य पण्डित मुकुन्द नेपालले मन्तव्य राखेका थिए ।
अनादिकालदेखि धार्मिक आस्थाको केन्द्रका रूपमा रहँदै आएको गरामनी शक्तिपीठमा बडादशैँको अवसरमा विगत १५ वर्षदेखि पुराण आयोजना हुँदै आएको छ । गत वर्ष जेनजी आन्दोलनका कारण पुराण आयोजना गर्न नसकिएपछि मन्दिरमा चण्डी पाठ गरिएको थियो ।
यस वर्ष भने नियमित धार्मिक परम्परालाई निरन्तरता दिँदै पद्म महापुराण ज्ञान महायज्ञ आयोजना गरिएको हो। महायज्ञ शुरुवात गर्नुअघि घटस्थापनाका अवसरमा कलश यात्रा निकालिएको थियो ।
असोज २६ देखि ३१ गतेसम्म प्रत्येक दिन बिहान ७ बजे मण्डप पूजन तथा पाठ प्रारम्भ हुनेछ । बिहान १०:३० बजेदेखि दिउँसो ३:३० बजेसम्म कथा वाचन गरिनेछ भने साँझ ६ बजेदेखि राति ९ बजेसम्म सन्ध्याकालीन महाआरती (गंगा आरती) तथा भजनसन्ध्या सञ्चालन गरिने आयोजकले जनाएको छ ।
असोज ३० गते लक्ष्यदीप प्रज्वलन गरिनेछ । असोज ३१ गते यज्ञ समापनसँगै तिलक तथा प्रसाद वितरण गरिनेछ ।महायज्ञमा आचार्य पण्डित मुकुन्द नेपाल प्रमुख वाचक र आचार्य पण्डित मोहन घिमिरे उपवाचकका रूपमा रहेका छन् ।
