झापाको बिर्तामोड नगरपालिका-३ मा दुई दिने नेतृत्व विकास तालिम सुरु भएको छ ।
ग्लोवल लर्निङ ल्याबको आर्थिक सहयोगमा सहारा नेपाल र बिर्तामोड नगरपालिका-३ को समन्वयमा नेतृत्व क्षमता अभिवृद्धि र स्थानीयहरूलाई थप सक्षम बनाउने उद्देश्यले महेन्द्र रत्न माविको सभाहलमा तालिम सुरु भएको हो ।
वडाध्यक्ष मदन बुढाथोकीको अध्यक्षतामा भएको कार्यक्रममा वडा सदस्य लक्ष्मी रोक्का र इन्जिनियर प्रभाष थापा मगर लगायतको उपस्थिती रहेको थियो ।
उक्त तालिमको प्रशिक्षक कुसुम उप्रेती र विनोद दाहालले सञ्चालन गरिरहेका छन् ।
वडाका विभिन्न टोलहरूबाट प्रतिनिधिमुलक रूपमा सहभागी गराइएको तालिममा ३० भन्दा बढी सहभागी उपस्थित रहेका छन् । नेतृत्व विकास, व्यवस्थापन, कार्ययोजना निर्माण र सामुदायिक पहलकदमीबारे व्यावहारिक सिकाइ दिइने जनाइएको छ ।
वडाध्यक्ष मदन बुढाथोकीले वडालाई नेतृत्वयुक्त, सक्षम र सक्रिय बनाउन यस्तो तालिम आवश्यक भएकाले सबै टोलको सहभागिता सुनिश्चित गरिएको बताए ।
