इलाम सदरमुकामलाई झापाको बिर्तामोडसँग जोड्ने छोटो दुरीको केचना-कञ्चनजङ्गा मेची करिडोर सडकखण्ड अन्तर्गत पुवा खोलामा बेलिब्रिज निर्माण सम्पन्न भएको छ ।
पुल निर्माणसँगै मेची राजमार्गको भरपर्दो विकल्प खुलेको छ । जसले इलाम, पाँचथर र ताप्लेजुङसम्मको यात्रालाई सहज बनाएको छ । सङ्घीय सरकारको एक करोड ३५ लाखको लगानीमा यो बेलिब्रिज निर्माण गरेको हो ।
सडक डिभिजन इलामका सूचना अधिकारी इञ्जिनियर अर्जुन घिमिरेका अनुसार इलाम नगरपालिका-९ र ११ लाई जोड्ने यो पुल ४८.६ मिटर लामो छ । पुल नहुँदा विशेषगरी वर्षायाममा यो सडक पूर्ण रूपमा बन्द हुने र यात्रुहरूले जोखिमपूर्ण यात्रा गर्नुपर्ने बाध्यता थियो ।
इलाम नगरपालिका-९ का वडाध्यक्ष गोपाल चहानले भने ‘पहिले हिउँदमा त सडक प्रयोगमा आउँथ्यो, तर वर्षायाममा पूरै बन्द हुने गर्दथ्यो । बेलिब्रिज निर्माणले बाह्रै महिना सवारी आवागमनमा सहज हुने भएको छ ।’
गत वर्ष पहिरोले मेची राजमार्ग दुई साता बन्द हुँदा वैकल्पिक बाटो नहुँदा यात्रुहरूले ठूलो सास्ती खेपेका थिए । तर अब यो बेलिब्रिज बनेपछि मेची राजमार्गको गोलाखर्क खण्डबाट केचना-कञ्चनजङ्गा सडक प्रयोग गर्दा ४७ किलोमिटरमै बिर्तामोड पुग्न सकिन्छ ।
जबकि मेची राजमार्गबाट यो दुरी ८३ किलोमिटर छ । यस वैकल्पिक सडकको स्तरोन्नति पनि जारी छ । सडक डिभिजन प्रमुख इञ्जिनियर पवन भट्टराईका अनुसार, इलाम खण्डको माई नगरपालिका क्षेत्रमा १५ किलोमिटर सडक कालोपत्र भइसकेको छ । बाँकी १७ किलोमिटरमध्ये १४ किलोमिटरको ठेक्का लागेर निर्माण कार्य भइरहेको छ ।
