इन्डोनेशियाली प्रहरीले बच्चा तस्करी गर्ने एउटा अन्तर्राष्ट्रिय गिरोह पत्ता लगाएको छ ।
उक्त गिरोहले सन् २०२३ यता सिङ्गापुरमा कम्तीमा २५ जना शिशु बिक्री गरेको अधिकारीहरूलाई उद्धृत गर्दै बीबीसीले जनाएको छ ।
इन्डोनेशियाली अधिकारीहरूले यो हप्ता पोन्टियानक र टाङ्गेराङ्ग शहरबाट यो गिरोहसँग सम्बन्धित १३ जनालाई पक्राउ गरेका छन् भने अधिकारीहरूले तस्करी हुन लागेका झन्डै एक वर्ष उमेरका ६ जना शिशुको उद्धार गरेका छन् ।
ती शिशुहरूलाई गिरोहले पहिला पोन्टियानकमा राख्ने र सिङ्गापुर पठाउनुअघि अध्यागमनका लागि चाहिने कागजपत्र तयार गर्ने गरेको वेस्ट जाभा प्रहरीको अपराध अनुसन्धान विभागका महानिर्देशक सुरुवानले बीबीसी न्युज इन्डोनेशियालाई बताएका छन् ।
यो गिरोहले बच्चा हुर्काउन नचाहने आमाबुवा र गर्भवती महिलालाई सम्पर्क गर्ने गरेका थिए । केही शिशुहरू त गर्भमा हुँदा नै ‘बुक’ हुने गरेका थिए । प्रत्येक शिशु झन्डै ६ सय ७३ अमेरिकी डलरमा बिक्री भएका प्रहरीले जनाएको छ ।
इन्डोनेशियाली प्रहरीले अबको कार्य सिङ्गापुरमा ती शिशु लिने मानिसहरू पत्ता लगाउनु रहेको बताएको खबरमा उल्लेख छ ।
