झापाको अर्जुनधाराका ९६ परिवार अव्यवस्थित बसोबासीहरुलाई जग्गा धनीपुर्जा वितरण गरिएको छ ।
प्रतिनिधि सभाका सभामुख देवराज घिमिरेले अव्यवस्थित बसोबासीहरुलाई जग्गा धनीपुर्जा वितरण गरेका हुन् । राजस्व तिरेर योग्य बनेका १२८ घर परिवारमध्ये ९६ परिवारलाई धनीपुर्जा वितरण गरिएको हो ।
झापा क्षेत्र नं.२ का सांसदसमेत रहेका सभामुख घिमिरेले अव्यवस्थित बसोबासीहरुलाई जग्गाधनी पुर्जा वितरण गर्न पाउँदा अत्यन्तै खुसी लागेको बताउँदै नगरका सबै अव्यवस्थित बसोबासीहरुलाई क्रमश: धनीपुर्जा बितरण गरिने जानकारी दिए ।
भूमि व्यवस्था, सहकारी तथा गरिबी निवारण मन्त्री बलराम अधिकारीले २०२१ सालको पुरानो भूमि ऐनले वर्तमानका जटिलतालाई सम्बोधन गर्न नसक्ने भएकाले नयाँ कानुनको आवश्यकता रहेको बताए ।
अर्जुनधारा नगरपालिका प्रमुख बलदेवसिंह गोम्देनको अध्यक्षतामा भएको कार्यक्रममा भूमि समस्या समाधान आयोगका केन्द्रीय अध्यक्ष हरिप्रसाद रिजाल, कोशी प्रदेशका पूर्व मुख्यमन्त्री उद्धव थापा, संविधानसभा सदस्य तथा नेकपा एमाले जिल्ला समिति अध्यक्ष प्रेम गिरी, प्रदेश सभा सदस्य चिन्तन पाठक, कांग्रेसका जिल्ला सभापति देउकुमार थेबे, सुरक्षा निकायका प्रमुखहरु लगायतको उपस्थिति रहेको थियो ।
