पहाडी क्षेत्रमा हिमपात परेसँगै पूर्वी नेपालमा जाडो बढेको छ ।
कोशी प्रदेशको पाँचथर, ताप्लेजुङ, संखुवासभा लगायतका जिल्लामा हिमपात भएको हो ।
पाँचथरको फालेलुङसँगै आसपासका क्षेत्रमा यो वर्ष पहिलो पटक हिउँ परेको छ । बुधबार साँझ फालौट, चारराते, तीन सिमाना, सुर्केथामसँगै इलाम पाँचथरको सीमावर्ती सन्दकपुर क्षेत्रमा हिउँ परेको हो ।
उक्त क्षेत्रमा यो वर्ष पहिलो पटक हिउँ परेको चाररातेका पर्यटन व्यवसायी डिल्ली केरुङले जानकारी दिए । केरुङका अनुसार हिउँ परेपछि त्यस क्षेत्रका चौँरीखर्क सेताम्मे भएका छन् ।
सामान्य वर्षासँगै जिल्लाको उच्च हिमाली क्षेत्रमा हिमपात सुरु भएको छ । तीन हजार सात सय ९४ मिटरको उचाइमा पर्ने तीर्थस्थल पाथीभरा मन्दिरसहित जिल्लाका उत्तरी उच्च क्षेत्रमा हिमपात भएपछि जनजीवन प्रभावित भएको छ ।
पाथीभरा मन्दिर जाने पदमार्ग अन्तर्गत फेदीको बस्तीसहित सोभन्दा माथि हिमपात भइरहेको फेदीस्थित प्रहरी चौकीका हबल्दार मिलन कटुवालले जानकारी दिए ।
यसपटक लामो समयपछि जिल्लाको केही ठाउँमा सामान्य वर्षा भएको हो । हिउँद लागेपछि लामो समयसम्म पानी नपर्दा हिउँदे बालीनाली लगाएका किसानलाई भने समस्या भइरहेको थियो । सामान्य वर्षा र हिमपात हुन सुरु भएपछि भने यसले केही राहत पुग्ने किसानले बताएका छन् ।
केहि दिनयता चिसो बढेसँगै पाथीभरामा तीर्थयात्रीको आगमनको संख्या घटेको पाथीभरा क्षेत्र विकास समितिका कार्यकारी निर्देशक प्रजिन हाङबाङले बताए ।
त्यस्तै संखुवासभाको माथिल्लो क्षेत्रमा हिमपात हुँदा जनजीवन प्रभावित भएको छ ।
