झापाको चारआलीमा सूचना प्रविधि र सुरक्षा उपकरणसम्बन्धी सम्पूर्ण सेवा प्रदान गर्ने उद्देश्यका साथ नयाँ आइटी तथा इलेक्ट्रोनिक्स पसल ‘पाउ पाथिभरा सप्लायर्स’ सञ्चालनमा आएको छ ।
बिर्तामोड नगरपालिकाकी नगर प्रमुख पवित्रा महतरा प्रसाईं लगायतका विशिष्ट व्यक्तिहरूको विशेष उपस्थितिमा उक्त सप्लायर्सको समुद्घाटन गरिएको हो ।
यस सप्लायर्सलाई कैलास रेग्मी, राजेन्द्र रिजाल, कृष्णप्रसाद काफ्ले र कृ मल्टिप्रपोज प्रा.ली.ले संयुक्त रुपमा सञ्चालनमा ल्याएका हुन् । सामूहिक सहकार्य र लगानीबाट सुरु गरिएको यस पसलले चारआली र यस आसपासका क्षेत्रका बासिन्दालाई गुणस्तरीय, सर्वसुलभ र भरपर्दो सेवा दिने लक्ष्य राखेको छ ।
उद्घाटनसँगै सप्लायर्सले औपचारिक रुपमा आफ्नो व्यावसायिक सेवा सुरु गरेको छ । यस पसलबाट विशेषगरी कम्प्युटर र ल्यापटपका सम्पूर्ण पार्टपुर्जाहरू, अत्याधुनिक सिसिटिभी क्यामेरा, प्रिन्टर लगायतका सामग्रीहरुको खरिद-बिक्री हुनेछ । यसका साथै यी उपकरणहरूको सम्पूर्ण मर्मत (रिपेयरिङ) सम्बन्धी सेवाहरू पनि एउटै छानामुनि उपलब्ध हुने सञ्चालक समितिले जनाएको छ ।
सप्लायर्सका सञ्चालक मध्येका एक उत्सव भट्टराईले चारआली क्षेत्रमा सूचना प्रविधिको बढ्दो मागलाई मध्यनजर गर्दै ग्राहकलाई विश्वसनीय सेवा प्रदान गर्न यो पसलको सुरुवात गरिएको जानकारी दिए । उनका अनुसार अब सामान्य मर्मतदेखि नयाँ प्राविधिक उपकरण खरिदका लागि अन्य बजार धाउनुपर्ने झन्झट अन्त्य हुनेछ ।
उद्घाटन कार्यक्रमलाई सम्बोधन गर्दै सञ्चालक भट्टराईले समारोहमा उपस्थित नगर प्रमुख प्रसाईं लगायत सम्पूर्ण मान्यवर र अतिथिहरूमा नमन गर्दै हार्दिक धन्यवाद ज्ञापन गरेका थिए । उनले नयाँ सुरुवातमा सबैको साथ महत्त्वपूर्ण हुने भन्दै व्यवसायको सफलताका लागि आगामी दिनमा पनि सम्पूर्ण ग्राहक तथा शुभचिन्तकहरूबाट माया, सल्लाह र निरन्तर साथको अपेक्षा रहेको बताए ।
चारआलीमै सुलभ र भरपर्दो आइटी तथा मर्मत सेवा सञ्चालनमा आएपछि स्थानीय बासिन्दा, व्यवसायी, विद्यालय तथा विभिन्न संघसंस्थाहरूलाई कम्प्युटर तथा सिसिटिभी जडान र मर्मत सम्बन्धी कामको लागि निकै सहज हुने विश्वास लिइएको छ ।
