वामपन्थी नेता एवम् पूर्वमन्त्री प्रदीप नेपालको निधन भएको छ ।
पार्किन्सन्स रोगबाट पीडित नेपालको उपचारका क्रममा आज दिउँसो काठमाडौँको थापाथालीमा रहेको नर्भिक अस्पतालमा निधन भएको पारिवारिक स्रोतले जनाएको छ ।
७१ वर्षीय नेपाल लामो समयदेखि पार्किन्सन्स रोगबाट पीडित थिए । केही दिनअघि अस्पताल भर्ना भए पनि आज उनलाई आईसीयूमा सारिएको थियो ।
नेता नेपाल २०१० साल पुस ८ गते भोजपुरको पोखरे गाउँमा जन्मिएका हुन । एमाले वृत्तमा कडा मिजासका बौद्धिक नेताको परिचय बनाएका उले २०२६ सालमा सगरमाथा स्वतन्त्र विद्यार्थी युनियनको सदस्य भएर राजनीतिक जीवनको सुरुवात गरेका थिए ।
नेपाल सूचना तथा सञ्चार, जलस्रोत, स्वास्थ्य तथा शिक्षा तथा खेलकुदमन्त्री बनेका थिए । साहित्यकारसमेत रहेका नेपालका उपन्यास, कथा, गीत, नियात्रालगायतमा कलम चलाएका थिए ।
२०८० साल चैत ३० मा भक्तपुरमा आयोजित एक साहित्यिक कार्यक्रममा सहभागी हुने क्रममा अचानक बिरामी परेपछि उनी सार्वजनिक कार्यक्रममा त्यति धेरै सक्रिय नरहेका उनी सप्तकोशी मिडिया प्रालिको अध्यक्षसमेत थिए ।
नेपालको आजै पशुपति आर्यघाटमा रहेको विद्युतीय शवदाह गृहमा अन्त्येष्टि गर्ने कार्यक्रम रहेको एमाले प्रचार तथा प्रकाशन विभाग प्रमुख राजेन्द्रप्रसाद गौतमले जानकारी दिए ।
