झापाको अर्जुनधारा-१० नं.वडा कार्यालयले चालु आर्थिक वर्ष ०८१/०८२ देखि वडास्तरिय योजना अन्तरगत कृषि तथा पशु विकास कार्यक्रम सञ्चालन गरेको छ ।
अर्जुनधारा-१० वडाध्यक्ष भूपेन्द्र न्यौपानेको अध्यक्षतामा आयोजित शिविरको प्रमुख अतिथि नगर पशुपन्छी तथा मत्स्य विकास शाखा प्रमुख पदमलाल राईले उद्घाटन गरेका थिए ।
नगर पशुपन्छी मत्स्य विकास शाखाको प्राविधिक सहयोगमा बिहीवारदेखि वडाको १ नं.टोलबाट सुरु भएको शिविर पुस १७ गते सम्पन्न हुने छ ।
विगत आर्थिक वर्षहरुमा शिविर मात्र सञ्चालन गर्दै आएको कार्यालयले यस वर्षदेखि वडामा रहेका अनुमानित सात सय बढी पशुपालक कृषकहरुलाई लक्षित गरि उक्त कार्यक्रम सञ्चालन गरेको वडा सचिव त्रिविक्रम पोखरेलले जानकारी दिए ।
कार्यक्रम अन्तरगत वडाका पाँच वटा टोलमा पशु परजिवी नियन्त्रणका लागि शिविर सञ्चालन गरिने बताइएको छ । शिविरमा नि:शुल्क गोबर जाँचसँगै कृषकहरुलाई जुका, नाम्ले, किर्ना, उपियाँको औषधी प्रदान गरिने छ ।
चालु आर्थिक वर्षमा तीन लाख ५० हजार रुपैयाँ बजेट विनियोजन गरिएको कार्यक्रम सफल भएको खण्डमा आगामी आर्थिक वर्षहरुमा पनि वडाले निरन्तरता दिने बताइएको छ ।
