चारआली साना शहरी खानेपानी उपभोक्ता तथा सरसफाइ संस्थाका नवनिर्वाचित पदाधिकारीहरुको सपथ ग्रहण तथा पद हस्तान्तरण कार्यक्रम सम्पन्न भएको छ ।
गत मंसिर १ गते सम्पन्न निर्वाचनमा विजयी उम्मेदवारहरुलाई बिहीबार एक कार्यक्रमका बीच सपथ खुवाउनुका साथै पद हस्तान्तरण गरिएको हो ।
नवनिर्वाचित कार्यसमिति र लेखा समितिलाई सपथ खुवाएपछि प्रमाणपत्र समेत वितरण गरिएको छ । नवनिर्वाचित अध्यक्ष राजन चिमरिया, उपाध्यक्ष मैया कार्की, सचिव प्रेमराज घिमिरे, कोषाध्यक्ष साउन मेचे बादललाई सपथ खुवाइएको थियो ।
त्यसैगरी सदस्य चन्द्रकला तवेबुङ, हरिप्रसाद घिमिरे, अन्जु फेवादिन लेखा समिति संयोजक अर्जुन खनाल, सदस्य रुद्रप्रसाद रिजाल, रितादेबि रिजाल न्यौपानेलाई समितिका संयोजक सन्न्तोष नेउपानेले सपथ खुवाएपछि प्रमाणपत्र प्रदान गरेका थिए ।
उक्त अवसरमा संस्थाका नवनिर्वाचित अध्यक्ष चिमरियाले १ सय दिने योजना अघि सारेका छन् । सपथ ग्रहणपछि बोल्दै उनले सय दिने अभियान सुरु गरेका हुन् ।
पहिलो प्रयासमा समाजका प्रतिष्ठित बौद्धिक व्यक्तिहरुको सल्लाहकार समिति गठन गर्ने, सय दिनभित्र नयाँ ट्याङ्की निर्माणका लागि जग्गाको व्यवस्थापनसहित डिप बोरिङ गर्ने, पानी चुहावटलाई नियन्त्रण गर्नेदेखि श्रोतको व्यवस्थापन, प्रशोधन र बजारिकरणलाई प्राथमिकता दिने प्रतिबद्धता जनाएका थिए । आफ्नो कार्यकालमा कुनै दल, यो त्यो नभनी साझा रुपमा अघि बड्ने उनको भनाइ थियो ।
निर्वाचन समितिका संयोजक सन्तोष नेउपानेको अध्यक्षतामा भएको कार्यक्रममा मेचीनगर-१२ का वडाध्यक्ष एवम् संस्थाका निवर्तमान अध्यक्ष मधुसूदन निरौला, मेचीनगर-१३ का वडाध्यक्ष कृष्णराज सिग्देल, काँकरभिट्टा खानेपानी उपभोक्ता तथा सरसफाई समितिका अध्यक्ष रोहितकुमार बुढाथोकीले लगायत आ-आफना धारणा राखेका थिए ।
उक्त कार्यक्रमको सञ्चालन निर्वाचन समितिका सदस्य गुरुभक्त काफ्लेले गरेका थिए ।
