मेची-महाकाली राष्ट्रिय उद्धार यात्राको दशौँ दिन बुधबार १२ जना सडकआश्रित मानवहरुको उद्धार गरिएको छ ।
‘यो पटकको चाडपर्वमा कसैले बस्न नपरोस् सडकपेटीमा’ भन्ने भावनासहित मानवसेवा आश्रम र आनी छोइङ डोल्मा फाउन्डेसनको संयुक्त आयोजनामा सुरु भएको यात्रामा बुधबार दुईबालिका सहित १२ जनाको उद्धार भएको हो ।
बुधबार मेची-महाकाली राष्ट्रिय उद्धार यात्राअन्तर्गत भरतपुर, सिजी, कावासोत, चोरमारा, दुम्कीबास, क्षेत्रमा उद्धार टोली खटिएको हो ।
मंगलबार रातिको सडक सेवामा खटिएको उद्धार टोली चितवन खैरहनी नगरपालिका-१ ज्यामिरे बाट ४५ वर्षीय आमा र ११ वर्षीय छोराको उद्धार गर्न सफल भएको हो । बुधबार बिहान भरतपुर महानगरपालिका-१ बाट दुई जना महिला गरि चितवनबाट चार जनाको उद्धार गरिएको छ ।
त्यस्तै गैँडाकोट नगरपालिका-१० बाट एक जना, देवचुली नगरपालिका-१३ बाट एक जना, कावासोती नगरपालिका-८ बाट दुई जना, मध्यबिन्दु नगरपालिका-७ चोरमाराबाट दुई बालिका सहित पाँच जना र विनयी त्रिवेणी गाउँपालिका-२ बाट एक जना गरि बुधबार १२ जनाको उद्धार भएको छ । नवलपरासी पूर्वबाट उद्धार हुनेको सङ्ख्या १० रहेको छ ।
त्यस्तै उद्धार गरिएको १२ जनालाई मानवसेवा आश्रम चितवन सेवाकेन्द्रमा संरक्षणको लागि लगिएको छ ।
असोज २८ गते मेचीनगरदेखि सुरु भएको यात्राको दशौँ दिनसम्मको अवधिमा ९८ जना सडकआश्रित मानवहरुको उद्धार गरिएको मानवसेवा आश्रमका संस्थापक अध्यक्ष रामजी अधिकारीले बताए । उद्धार भएकामा २७ महिला र ७१ पुरुष रहेका छन् ।
