झापाको अर्जुनधारामा एकजना व्यक्तिले धारिलो हतियार प्रहार गरी आफ्नै श्रीमतीको हत्या गरेका छन् ।
अर्जुनधारा-३ दार्जिलिङ डाँडाका भरत कुमालको घर आँगनमा सोही वडाको जुँगेघारी बस्ने ४६ वर्षीय वीरबहादुर चौहानले धारिलो हतियारले घाँटीमा प्रहार गरी आफ्नै श्रीमती ३७ वर्षीया मुना भुजेल चौहानको हत्या गरेका हुन् ।
हतियार प्रहारबाट मुनाको घटनास्थलमै मृत्यु भएको प्रहरीले जनाएको छ । हतियार प्रहार गरी वीरबहादुर फरार भएका थिए ।
जुकेखाडी सामुदायिक वनको देवीथान होल भन्ने ठाउँमा लुकेर बसेको अवस्थामा इलाका प्रहरी कार्यालय बिर्तामोडबाट खटिएको टोलीले उनलाई नियन्त्रणमा लिएको जिल्ला प्रहरी कार्यालय झापाले जनाएको छ ।
पहिलाको श्रीमानलाई छोडेर मुना वीरबहादुरसँग आएकी थिइन् । उनीहरूका एक छोरा र एक छोरी रहेका छन् । वीरबहादुरलाई पक्राउ गरी इलाका प्रहरी कार्यालय बिर्तामोड ल्याइएको छ ।
