काठमाडौं । चैत मसान्त नकिकिएसँगै सरकारले बजेट खर्च बढाउँदा बैंकहरुमा निक्षेप पनि बढेको छ । एक सातामा नै वाणिज्य बैंकहरुले ४० अर्बले निक्षेप बढाएको छन् ।
चैत १४ गते ३८ खर्ब ५० अर्ब रहेको बैंकहरुको कुल निक्षेप एक सातमा नै ४० अर्बले बढेर ३८ खर्ब ९० अर्ब पुगेको नेपाल बैंकर्स संघले जनाएको छ ।
निक्षेप बढे पनि सोही हाराहारीमा कर्जा पनि बढेको छ । पछिल्लो एक सातामा बैंकहरुले ३९ अर्ब कर्जा विस्तार गरेका छन् । चैत १४ गते ३४ खर्ब ६२ अर्ब रहेको बैंकहरुको कर्जा लगानी चैत २१ गते आउँदा ३९ अर्बले बढेर ३५ खर्ब १ अर्ब पुगेको छ । वाणिज्य बैंकहरुले एक सातामा धेरै निक्षेप बढाएको असोज अन्तिम सातापछि धेरै हो ।
एक सातामा सरकारले पुँजीगत खर्च अपेक्षाकृत बढाउन नसके पनि कुल बजेट खर्च भने उल्लेख्य रुपमा बढाएको छ । जसले गर्दा बैंकहरुमा निक्षेप पनि बढेको हो ।
चैत १४ गते ९१ अर्ब ६ करोड ६४ लाख रहेको पुँजीगत चैत २१ गते ९३ अर्ब २६ करोड ५५ लाख पुगेको छ । तर, चैत १४ गते ६ खर्ब २० अर्ब १९ करोड १२ लाख रहेको सरकारको कुल बजेट खर्च चैत २१ गते ६ खर्ब ६६ अर्ब ८४ करोड ८५ लाख पुगेको महालेखा नियन्त्रकको कार्यालयले जनाएको छ ।
एक सातमा वित्तीय व्यवस्थातर्फ मात्रै १० अर्ब बजेट खर्ब भएको छ । चैत १४ गते ४१ अर्ब ६७ करोड १६ लाख रहेको वित्तीय व्यवस्थातर्फको खर्च चैत २१ गते ५१ अर्ब ६७ करोड १६ लाख पुगेको छ । सरकारको पुँजीगत बजेट खर्च नबढे पनि वित्तीय व्यवस्थातर्फ र चालुतर्फको बजेट खर्बमा भएको वृद्धिले बैंकिङ प्रणालीलाई भने केही राहत दिएको छ ।
बाह्रखरी
