शैक्षिक क्षेत्रमा करिब तीन दशकबाट सक्रिय उत्तम खनाल बिर्तामोडबासीका लागि नयाँ नाम होइन् । शैक्षिक क्षेत्रको लामो अनुभवलाई सदुपयोग गर्दै खनालले नजिकिदै गरेको स्थानीय तहको निर्वाचन अन्तरगत बिर्तामोड नगरपालिकाको मेयर पदका लागि उम्मेदवारी दिने चर्चा चुलिएको छ ।
समाजसेवालाई सँगसँगै अगाँल्दै अघि बढेका अब्बल तथा शैक्षिक अभियान्ता खनालले राष्ट्रिय स्वतन्त्र पार्टीका तर्फबाट मेयर पदको बलियो उम्मेदवारका रुपमा आफूलाई प्रस्तुत गर्ने तयारी गरिएको बुझिएको छ ।
राजनीति क्षेत्रमा करिब १५ वर्षबाट क्रियाशिल भए तापनि अब भने सक्रिय रुपमा राजनिती क्षेत्रबाट केही पृथक योजनसहित अघि बढ्ने उनको योजना रहेको छ ।
गोमेन्द्र बिर्ता मोडलका फाउन्डर समेत रहेका खनाल हाल रास्वपाको प्रदेश शिक्षा समिति सदस्य रहेका छन् ।
बिर्तामोड नगर प्याब्सनको १३ वर्ष नेतृत्व गरेका खनालले सुन्दर सामुदायिक प्रहरी सेवा केन्द्र, जिल्ला हिसानको वरिष्ठ उपाध्यक्ष, मेची सहकारी बिर्तामोड संयोजक, बाल संगठन झापा जिल्ला सदस्य लगायत अन्य संघसंस्थामा विभिन्न पदमा बसेर काम गरेको अनुभव रहेको छ ।
खनालले आफूलाई पार्टीले विश्वास गरेर टिकट दिएर जनताले नगर प्रमुखमा निर्वाचित गराएमा आफ्नो कार्यकालमा पालिकाको गाडी प्रयोग नगर्ने घोषणा समेत गरेका छन् ।
उनी भन्छन् “यदि पार्टीले मलाई विश्वास गरेर मेयर पदमा टिकट दिएर जनताको मन जितेर निर्वाचित भएमा म राज्यले प्रदान गर्ने गाडी होइन, आफनै निजी सवारी प्रयोग गर्नेछु, बरु उक्त गाडीलाई अतिआवश्यक कामका लागि प्रयोगमा ल्याउने छु ।”
उनले कार्यपालिका बैठकलाई जनता सामू जस्ताको त्यस्तै पुर्याउन प्रत्येक मिटिङ्गलाई लाइभ गर्ने समेत बताए ।
उनका अनुसार जनताले स्थानीय तहबाट ठूलो अपेक्षा समेत नराखेको बताउँछन् । जनताले प्रत्येक वडाबाट सिटामोल, एम्बुलेन्स तथा कृषकका लागि आवश्यक सामग्री सहुलियतमा प्रदान गरोस् भन्ने अपेक्षा राख्ने भएकाले त्यस्ता आवश्यकतालाई प्राथमिकतामा राखेर काम गर्ने बताए ।
उनले आफनो कार्यकालमा शिक्षा, स्वास्थ्य तथा पूर्वाधारको क्षेत्रमा काम गर्ने उद्देश्य रहेको बताए । शैक्षिक क्षेत्रमा लामो समय काम गरेको हिसाबले खनालले आफनो तलबबाट विपन्न परिवारका बालबालिकालाई नि:शुल्क पढाउने लक्ष्य रहेको बताएका छन् ।
उनका अनुसार स्थानीय तहमा आउने अनुदान वा कार्यक्रमका लागि आफ्ना मान्छे छान्ने परिपाटीलाई अन्त्य गर्ने बताए ।
पछिल्लो समय बाटो नबन्दा जनता आक्रोशित हुने भन्दा पनि बिग्रेको बाटो तत्काल पुन: निर्माण नगर्दा निराश हुने परिपाटी बढेको भन्दै त्यस्ता समस्यालाई अन्त्य गर्ने खनालले बताएका छन् ।
शिक्षासेवीबाट जनसेवामा लाग्ने खनालको चर्चाले आम नगरवासीमा सकारात्मक सन्देश फैलिदै गएको बुझिएको छ ।
