पछिल्लो समय बालबालिकामा जंगफुडको लत हटाउनु अभिभावकहरुलाई लागि टाउको दुखाईको विषय बनेको छ ।
बालबालिकालाई जंगफुडको लतबाट हटाउनु सजिलो छैन, यद्यपि असम्भव पनि होइन । सही तरिका अपनाउँदा यो सम्भव हुने बालरोग विशेषज्ञ डा.आरती श्रेष्ठ बताउँछिन् ।
उनका अनुसार बालबालिकामा जंगफुडको लत कम गर्नका लागि अभिभावकले घरमै स्वस्थ खाने बानी विकास गराउनु अत्यन्त आवश्यक हुन्छ । जब बच्चाले बारम्बार जंग फुड खान्छ, त्यो बानी जस्तो बन्छ। त्यसलाई हटाउन विकल्पस्वरूप स्वादिष्ट तर पौष्टिक खाना दिनु, र अभिभावक आफैंले राम्रो उदाहरण प्रस्तुत गर्नु जरुरी रहेको उनको भनाई छ ।
यी हुन् जंग फुडको लत हटाउने उपायहरु
१.घरमै स्वस्थ विकल्प दिनु
चाउचाउ, चिप्सको सट्टा फलफूल, नट्स जस्ता खानेकुरा दिनुहोस् ।
घरमै बनाइएको खाना स्वादिलो बनाउनुहोस् ।
२.बिस्तारै कम गराउने
एक्कासी रोक्नु भन्दा बिस्तारै मात्रा घटाउनु राम्रो हुन्छ ।
हप्तामा कति पटक खान पाइने भनेर नियम बनाउनुहोस् ।
३. अभिभावक नै रोल मोडल बन्नुहोस्
बच्चाले देखेर सिक्ने भएकाले तपाईंले पनि जङ्क फुड कम खानुहोस् ।
४. स्कुल र साथीहरूको प्रभाव बुझ्नु
साथीहरूले के खान्छन् भन्नेले पनि बच्चाको खानपानमा असर गर्छ । त्यसकारण बच्चासँग खुलेर कुराकानी गर्नुहोस् ।
५.पोषणको महत्त्व बुझाउनु
बच्चालाई जंगफुडको कारण पर्ने असर तथा पोषणयुक्त खानेकुराको महत्वको बारेमा जानकारी दिएर पनि जंगफुडको सेवन कम गराउन सकिन्छ ।
