इलाम झापा मैत्री समाज बिर्तामोडले एक सय भन्दा बढी महिलाहरुलाई सेनिटरी प्याड वितरण गरेको छ ।
बिर्तामोड नगरपालिका वडा नं.१० का वडाध्यक्ष दुर्योधन गुरुङको प्रमुख आतिथ्य तथा समाजकी अध्यक्ष तिलोत्तमा खत्रीको सभापतित्वमा आयोजित कार्यक्रमकाबीच विपन्न तथा पिछडीएका समुदायका महिलाहरुलाई तीन हजार सेनिटरी प्याड वितरण गरिएको हो ।
कार्यक्रममा बोल्दै प्रमुख अतिथि गुरुङले महिलाको स्वास्थ्यसँग सम्बन्धित सचेतना कार्यक्रम सञ्चालन गरेको भन्दै इलाम-झापा मैत्री समाजलाई धन्यवाद ज्ञापन गरेका थिए ।
संस्थाकी अध्यक्ष खत्रीले स्वागतसहित औचित्यमाथि प्रकाश पारेको कार्यक्रममा महिला उद्यमी समूह बिर्तामोडकी अध्यक्ष राधिका चुडाल हुँमागाई, बिर्तामोड नगरपालिका-१० की वडा सदस्य धनमाया श्रेष्ठ, बिर्तामोड-१० की कर्मचारी ममता तामाङ लगायतले शुभकामना मन्तव्य राखेका थिए ।
इलाम-झापा मैत्री समाजकी बिर्तामोड नगर अध्यक्ष अञ्जु लामिछानेले सञ्चालन गरेको कार्यक्रमको सहजीकरण बिर्तामोड नगर कोषाध्यक्ष दुर्गा पोखरेल ‘घिमिरे’ र सदस्य गंगा खनालले गरेका थिए ।
तार्गेट मेनपावरका सञ्चालक कृष्ण गौतमले इलाम-झापा मैत्री समाजलाई सेनिटरी प्याड सहयोग गरेका थिए । मनोज श्री सप्लायर्सले सहभागीहरुलाई मायाको चिनो स्वरुप कस्मेटिक आइटम (झुम्का) प्रदान गरेको थियो ।
