गाजामा भोकमरीको समस्या बढ्दो, बजारमा खाद्यान्न उपलब्ध नहुँदा खरिद गर्न कठिनाइ

संवाददाता/ शनिबार, साउन १८, २०८२

राहतकर्मीहरूले गाजाका झन्डै १० हजार भोकमरी पीडित परिवारलाई खाद्यान्न किन्नका लागि नगद सहयोग दिए पनि बजारमा खाद्यान्न उपलब्ध नहुँदा खरिद गर्न कठिनाइ भएको छ ।

संयुक्त राष्ट्रको मानवीय सहायता समन्वय कार्यालयका अनुसार बजारमा खाद्यान्न निकै कम छ र उपलब्ध खाद्यान्नको मूल्य धेरै अस्थिर छ । धेरै मानिस लागि खाद्यन्न किन्ने पहुँच बाहिर छन् । इजरायलले राहत सामग्री पठाउन केही अनुमति दिए पनि गाजामा आवश्यक सहयोग पर्याप्त रूपमा पुग्न सकेको छैन ।

सहायता सामग्री लैजाने गाडीहरू तोकिएका बाटोमा अवरोध र जोखिमको सामना गरिरहेका छन् । धेरै महिनादेखि खाद्यान्न अभावले जनजीवन झनै कठिन बनेको छ ।

त्यस्तै खाना खोज्न जाँदा धेरै मानिस घाइते वा मारिएका छन् । विगत दुई दिनमा मात्रै सयभन्दा बढी मानिसहरू खाद्यान्न ढुवानी मार्ग वा इजरायली सैनिक वितरण केन्द्र नजिकै मारिएका छन् ।