झापा गाउँपालिकालाई पूर्ण खोप सुनिश्चितता तथा दिगोपना गाउँपालिका घोषणा गरिएको छ ।
पूर्ण खोप सुनिश्चितता निर्देशिका २०७९ (संशोधन सहित) बमोजिम सम्पूर्ण प्रकृया पुरा गरी झापा गाउँपालिकाभित्र रहेका १६ देखि ५९ महिनासम्मका सम्पूर्ण बालबालिकाहरुलाई १५ महिना पुरा भएपछि पूर्ण खोप पाएको सुनिश्चित गरी पूर्ण खोप सुनिश्चितता तथा दिगोपना गाउँपालिका घोषणा गरिएको हो ।
गाउँपालिकाको सात वटै वडाबाट सबै बालबालिकाले खोप लगाउने कार्य सम्पन्न भएपछि गाउँपालिकालाई पूर्ण खोप सुनिश्चितता घोषणा गरिएको स्वास्थ्य शाखा प्रमुख प्रेमप्रसाद न्यौपानेले जानकारी दिए ।
शाखा प्रमुख न्यौपानेले आर्थिक वर्ष २०८१/८२ मा झापा गाउँपालिकाको सात वटै वडामा १५ महिना माथिका कुल ६ सय ३९ जना बालबालिकालाई १३ प्रकारका खोप सात पल्टमा लगाएर खोप कार्य सम्पन्न गरिएको बताए ।
झापा गाउँपालिकाका कार्यवाहक अध्यक्ष अन्जुदेवी थपलियाको अध्यक्षता एवम् झापा जिल्ला खोप समन्वय समितिका संयोजक रहेका जिल्ला समन्वय समिति झापाका प्रमुख विश्वनाथ बरालको प्रमुख आतिथ्यतामा गाउँपालिकालाई पूर्ण खोप सुनिश्चितता तथा दिगोपना घोषणा गरिएको हो ।
कार्यक्रममा प्रमुख अतिथि बराल, झापा गाउँपालिकाका कार्यवाहक अध्यक्ष थपलिया, प्रमुख प्रशासकीय अधिकृत गजेन्द्र थपलिया, स्वास्थ्य कार्यालय झापाका वरिष्ठ खोप अधिकृत राजकुमार पोख्रेल, वडा नं ७ का वडाध्यक्ष सखिचन्द्र ठाकुरलगायतले शुभकामना मन्तव्य राखेका थिए ।
सात वटै वडाका वडाध्यक्ष, स्वास्थ्यकर्मी र स्वयंसेविकालाई सम्मान गरिएको कार्यक्रमको सञ्चालन स्वास्थ्य शाखा प्रमुख न्यौपानेले गरेका थिए ।
