झापाको बिर्तामोडस्थित गोर्खा टेलरिङले अल्लो र खाँडी कपडाको ब्रान्डिङका लागि देउसी डकुमेन्ट्री बनाउने भएको छ ।
अघिल्लो वर्षदेखि अल्लो र खाँडी वर्ष मनाउन थालेको गोर्खा टेलरिङका सञ्चालक वीरबहादुर दर्नालले बिर्तामोडका सयजना गन्यमान्यहरुको भिडियो डकुमेन्ट्री बनाउने बताए ।
गोर्खा टेलरिङ बिर्तामोडद्वारा आयोजना गरिएको पत्रकार सम्मेलनमा बोल्दै दर्नालले अल्लो र खाँडीको प्रवर्द्धनका लागि देउसी डकुमेन्ट्री बनाउने जानकारी दिए ।
‘घरेलु उत्पादनलाई प्रवर्धन गरौं, नेपाली संस्कृतिको संरक्षण गरौं’ भन्ने मुल नाराका साथ अल्लो र खाँडीको ब्रान्डिङका लागि देउसी डकुमेन्ट्री बनाउन लागिएको दर्नालले बताए । उनले पूर्वमै सबैभन्दा धेरै अल्लो र खाँडीका गोर्खा टेलरिङले बिक्री गर्दै आएको दावी गरेका छन् ।
उक्त डकुमेन्ट्री तयार गर्नुपूर्व अल्लो र खाँडीका उत्पादक किसानहरुसँग संखुवासभाको खाँदबारीमा अन्तरक्रिया गरिने र सोही कार्यक्रममा केही किसानलाई सम्मानसमेत गरिने दर्नालले जानकारी दिए ।
२० मिनेटको डकुमेन्ट्री तयार गर्न करिव ३० लाख रुपैयाँ खर्च हुने र सामाजिक संघसंस्था, सामाजिक व्यक्तित्व, राजनीतिज्ञ, स्थानीय सरकार र प्रदेश सरकारको सहयोग तथा समन्वयमा त्यसलाई तयार गरिने दर्नालले बताए । देउसी डकुमेन्ट्रीका लागि गीतको तयारी हुँदै गरेको र तिहारको अवसर पारेर रिलिज गरिने उनको भनाइ छ ।
