झापाको मेचीनगरमा राष्ट्रिय प्रजातन्त्र पार्टीले किसानलाई सम्मान गरेको छ ।
२१औँ राष्ट्रिय धान दिवस तथा रोपाइँको अवसरमा मेचीनगर नगरपालिका वडा नं.१२ सहरेडाँगीमा हली, बाउसे र रोपारलाई टोपी, माला र खादा लगाएर सम्मान गरिएको हो ।
यसैबीच बेठी लगाएर धान रोपाइँ गर्ने परम्परा लोप हुँदै गइरहेको बेला बेठी लगाएर धान रोपाइँ पनि गरिएको छ । 
राष्ट्रिय प्रजातान्त्रिक किसान संगठन मेचीनगरको आयोजना, राप्रपा बुद्धशान्ति गाउँपालिकाको सह-आयोजना तथा राप्रपा मेचीनगर-१२ को व्यवस्थापनमा बेठी लगाएर धान रोपाइँ गरिएको हो ।
बेठी लगाएर धान रोप्ने चलन निकै पुरानो मानिन्छ । ग्रामीण भेगका गाउँबस्तीमा असारे भाका गाउँदै रोपाइँ गर्ने चलन पछिल्लो समय लोप हुन थालेको छ । तर, झापाको मेचीनगरमा यसको संरक्षण गर्नुपर्छ भन्ने मान्यताका साथ नौमती बाजासहित रोपाइँ गरिएको हो ।
असारे भाकामा बाउसे र रोपाहारको दोहोरीसहितको धान रोपाइँ बेठी परम्परा किसानको संस्कृति अब स्मृतिमा सीमित हुँदै जान थालेकाले यसलाई जिवन्त राख्नका लागि कार्यक्रम आयोजना गरिएको राप्रपा मेचीनगर-१२ अध्यक्ष इन्द्रमणी प्रसाईंले जानकारी दिए ।
राष्ट्रिय प्रजातान्त्रिक किसान संगठन मेचीनगरका उपाध्यक्ष प्रेम इन्जामको अध्यक्षतामा भएको कार्यक्रमको प्रमुख अतिथि राप्रपा केन्द्रिय सदस्य श्याम ओली रहेका थिए ।
उक्त अवसरमा राप्रपा झापा जिल्ला अध्यक्ष केशवप्रसाद ओझासहित केन्द्रिय, प्रदेश, जिल्ला, नगर र वडासम्मका नेताकार्यकर्ताको सहभागिता रहेको कार्यक्रमको सञ्चालन राप्रपा मेचीनगरका सचिव विशाल बास्कोटाले गरेका थिए ।
