बैशाख २०, काठमाडौं । सरकारले अक्सिजन घरमा नराख्न अनुरोध गरेको छ । जगेडाका रुपमा घरमा अक्सिजन सिलिण्डर नराख्न स्वास्थ्य तथा जनसंख्या मन्त्रालयले नागरिकसँग आग्रह गरेको हो ।
केहीदिनमै अक्सिजन सिलिण्डर उपलब्ध हुने भन्दै अहिले जगेडाका रुपमा राखिएका अक्सिजन सिलिण्डर सरकारलाई उपलब्ध गराएर विरामीको ज्यान बचाउन मन्त्रालयले आग्रह गरेको छ ।
“तपाईंले घरमा जगेडाको रूपमा राखेको अक्सिजन सिलिण्डरले आज कसैको ज्यान जोगाउन सक्छ, त्यसैले अनावश्यक रुपमा अक्सिजन सिलिण्डरको भण्डार नगरौं,” मन्त्रालयले भनेको छ, “सरकारले अक्सिजनको अभाव हुन नदिन आवश्यक प्रबन्ध गरिसकेको छ । अभाव नहुने गरी थप सिलिण्डरको व्यवस्था गरिसकेको छ ।”
आवश्यक सिलिण्डरहरु केही दिन भित्रै आइपुग्ने भएकोले अहिले हाहाकार गरेर समस्यामा थप ‘समस्या’ नथन्न मन्त्रालयको आग्रह छ ।
“पैसाको नोक्सान गर्दै ठूलो दुर्घटना निम्त्याउन सक्ने यस खालका सिलिण्डरहरु घरमा नराखौं,” भन्दै मन्त्रालयले जिम्मेवार बन्न सबैसँग आग्रहसमेत गरेको छ ।
सरकारले केहीदिन अगाडि अक्सिजनबाट चल्ने उद्योग तत्काल अर्को सूचना जारी नहुँदासम्मका लागि बन्द गर्न निर्देशन दिएको थियो ।
नेपालमा पर्याप्त मात्रामा अक्सिजन प्लान्ट भए पनि अक्सिजन सिलिण्डरको अभाव छ । त्यसैले सरकारले ५० हजार अक्सिजन सिलिण्डर आयात गर्ने र यसमध्ये २० हजार सिलिण्डर तत्काल फाष्ट ट्रयाकबाट खरिद गर्ने तयारी गरिरहेको छ ।
सामान्य समयमा नेपालमा उत्पादित अक्सिजनको २० प्रतिशत मात्रै खपत हुने गरेको सरकारको दाबी छ ।
बाह्रखरी
