जन्मदिनका अवसरमा हुने तडकभडक र फजुल खर्चलाई निरुत्साहित गर्दै हाम्रो नेपाल संस्था साकोसका उपाध्यक्ष एवं कार्यवाहक अध्यक्ष राजेन्द्र गौतमले जेहेनदार छात्राको शिक्षामा सहयोग गरेका छन् ।
पत्रकार समेत रहेका गौतमले आफ्नो जन्मदिनको अवसरमा लक्ष्मी क्याम्पस बनियानीमा बीबीएस प्रथम वर्षमा अध्ययनरत मोनिका राजवंशीलाई मंगलबार पाँच महिनाको शिक्षण शुल्कसहित आवश्यक शैक्षिक सामग्री सहयोग गरेका हुन् ।
जन्मदिन मनाउने नाममा होटल तथा रेस्टुरेन्टमा ठूलो रकम खर्च गर्ने प्रवृत्ति बढिरहेका बेला त्यसको सट्टा विद्यार्थीको शिक्षामा सहयोग गर्ने उद्देश्यले आफूले यस्तो कार्यक्रम गरेको गौतमले बताए ।
‘होटल तथा रेस्टुरेन्टमा गएर फजुल खर्च गर्नुभन्दा विद्यार्थीको शिक्षामा सहयोग गर्दा वास्तविक आत्म सन्तुष्टि मिल्छ,’ गौतमले भने, ‘व्यक्तिगत रूपमा समाज र शैक्षिक क्षेत्रमा सकारात्मक सन्देश जाओस् र एउटा विद्यार्थीको अध्ययनमा सहजता होस् भन्ने उद्देश्यले यो विकल्प रोजेको हुँ ।’
भोजपुरको अरुण गाउँपालिकामा जन्मिएका गौतम विगत तीन दशकदेखि पत्रकारितामा समेत क्रियाशील छन् । उनी नेपाल प्रेस युनियनका केन्द्रीय सदस्य समेत हुन् । सहकारी क्षेत्रमा नेतृत्वदायी भूमिकामा रहेका गौतमले व्यक्तिगत खुसीलाई सामाजिक उत्तरदायित्वसँग जोड्दै विद्यार्थीको शिक्षामा सहयोग गरेका हुन् ।
उक्त अवसरमा हाम्रो नेपाल साकोस बनियानी सेवा केन्द्र सञ्चालन उपसमितिका संयोजक शुक्रराज लिम्बु ‘किरण’ले संस्थाको नेतृत्वमा रहेका व्यक्तिले व्यक्तिगत तवरबाट समाजप्रतिको उत्तरदायित्व निर्वाह गर्नु उदाहरणीय भएको बताएका थिए ।
त्यस्तै क्याम्पस प्रमुख मोतीलाल राजवंशीले विद्यार्थीको उज्ज्वल भविष्यका लागि गरिएको सहयोगले शैक्षिक क्षेत्रमा सकारात्मक सन्देश प्रवाह गर्ने बताए ।
