विद्यार्थीहरूले सीप र रोजगारी सुनिश्चित गर्ने नीति बनाउन सरकारसँग माग गरेका छन् ।
शिक्षा तथा खेलकुद मन्त्रालयले विद्यालय शिक्षा विधेयकको मस्यौदाबारे गरेको छलफलमा विभिन्न विद्यालयबाट प्रतिनिधित्व गरेका विद्यार्थीहरूले समान धारणा राखेका हुन् ।
शिक्षा मन्त्रालयले आइतबार विद्यालय व्यवस्थापन तथा पाठ्यक्रम व्यवस्थापन विषयक छलफल आयोजना गरेको थियो । उक्त छलफलमा विद्यार्थीहरूले शिक्षामन्त्री सस्मित पोखरेललाई सीपमूलक शिक्षा नीति बनाउन ध्यानाकर्षण गराएका थिए ।
विद्यार्थीहरूले शिक्षा सुधारको बहसमा विद्यार्थीको आवाजलाई केन्द्रमा राख्नुपर्नेमा जोड दिए । उनीहरूले विद्यालय र पाठ्यक्रम विद्यार्थीका लागि बनाइने भएकाले त्यसको निर्णय प्रक्रियामा विद्यार्थीको प्रत्यक्ष सहभागिता हुनुपर्ने बताए ।
शिक्षाको गुणस्तर भौतिक पूर्वाधारले मात्रै सुनिश्चित नहुने भन्दै भवनमा मात्रै ध्यान नदिन विद्यार्थीहरूले सरकारलाई ध्यानाकर्षण गराएका छन् ।
