पुरुषहरु भन्दा महिलालाई बढी टाउको दुख्छ भन्ने कुराहरुमा तपाईंहरु सहमत हुनुहुन्छ ? यो महिलाहरुलाई बढी टाउको दुख्छ भन्ने कुरामा सत्यता छ ।
महिलाहरूमा पुरुषको तुलनामा बढी टाउको दुख्नुको मुख्य कारण हर्मोनमा आउने परिवर्तन माइग्रेनको उच्च जोखिम, मानसिक तनाव, र शारीरिक थकान हो । महिनावारी, गर्भावस्था, र मेनोपजका समयमा हर्मोनको उतारचढावले दुखाइ बढाउँछ । साथै अनिन्द्रा, भिडभाड, र गलत खानपानले पनि यसलाई बढावा दिन्छन् ।
न्यूरो सर्जन डा.बिनोद राजभण्डारी टाउको दुखाईका कारण अस्पतालसम्म आइपुग्ने बिरामीको संख्याको आधारमा पनि पुरुषको तुलनामा महिलाहरुमा बढी आउने बताउँछन् ।
उनका अनुसार माइग्रेन पुरुषको तुलनामा महिलाहरुलाई धेरै हुने गर्छ । यो वंशाणुगत पनि हुन्छ । वंशाणुगत रुपमा स्थानन्तरण हुँदा पनि पुरुषको तुलनामा महिलामा बढी सर्ने गर्छ । यद्यपि पुरुषहरुलाई माइग्रेन नहुने भने होइन तर महिलाको तुलनामा भने कम हुने गर्छ । माइग्रेन सुगर र प्रेसरजस्तै हो, यसलाई निर्मुल पार्न नसकेपनि कम गर्न भने सकिन्छ । यद्यपि टाउको दुखाईको दर कम गर्न भने औषधि दिने गरिन्छ ।
महिलामा टाउको बढी दुख्नुका मुख्य कारणहरू
हर्मोनल परिवर्तन
महिलाको शरीरमा हुने हर्मोनल परिवर्तन, विशेष गरी महिनावारी हुनु अघि वा समयमा एस्ट्रोजन हर्मोनको स्तर घट्दा टाउको दुख्ने समस्या बढी देखिन्छ ।
माइग्रेन
माइग्रेन पुरुषमा भन्दा महिलामा तीन गुणा बढी हुन्छ । यो अक्सर टाउकोको एक भागमा केन्द्रित भएर अचानक सुरु हुन्छ ।
तनाव र चिन्ता
घर र कार्यस्थलको दोहोरो जिम्मेवारीले गर्दा हुने मानसिक तनाव र चिन्ताले पनि टाउको दुख्ने गर्दछ ।
अनिन्द्रा र थकान
समयमा नसुत्नु, थकान हुनु वा कामको चापले टाउको दुख्ने समस्या थपिन्छ ।
खानपान र जीवनशैली
अत्यधिक चिया/कफी, मदिरा, बजारको तयारी खाना वा पानी कम पिउनाले पनि टाउको दुख्न सक्छ ।
