बिर्तामोड उद्योग वाणिज्य संघका पूर्व अध्यक्ष कुमार भट्टराईले आफ्नो जन्मदिनलाई व्यक्तिगत उत्सवमा सीमित नराखी व्यवसायी समुदायको हित र एकताको सन्देशसँग जोड्दै संघको ‘व्यवसायी सदस्य राहत कोष’का लागि २१ हजार रुपैयाँ सहयोग गरेका छन् ।
संघको कार्यालयमा आयोजित संक्षिप्त कार्यक्रममा भट्टराईले संघका अध्यक्ष राजु न्यौपानेलाई रकम हस्तान्तरण गरेका हुन् ।
आपत्–विपद्, आकस्मिक दुर्घटना वा असहज परिस्थितिमा परेका व्यवसायीलाई तत्काल राहत उपलब्ध गराउने उद्देश्यले स्थापना गरिएको उक्त कोषलाई व्यवसायीहरूकै साझा सुरक्षा कवचका रूपमा विकास गर्ने लक्ष्य लिइएको संघले जनाएको छ ।
संघका अध्यक्ष राजु न्यौपानेले राहत कोषलाई एक करोड रुपैयाँसम्म पुर्याउने दीर्घकालीन लक्ष्य रहेको उल्लेख गर्दै त्यसका लागि व्यवसायीहरूको एकता र निरन्तर सहयोग अपरिहार्य रहेको बताए ।
कोष वृद्धिमा उल्लेखनीय योगदान पुर्याएको भन्दै संघले पूर्व अध्यक्ष भट्टराईलाई कदरपत्र प्रदान गरी सम्मान गरेको छ । व्यवसायी हितका सवालमा सधैं सक्रिय रहँदै आएका भट्टराईको यस योगदानलाई व्यवसायी समुदायले सकारात्मक उदाहरणका रूपमा लिएको छ ।
विशिष्ट सदस्य निर्मल भट्टराईसहित विभिन्न क्षेत्रका व्यवसायीहरूको उपस्थिति रहेको कार्यक्रमको सञ्चालन संघका महासचिव कुशल खतिवडाले गरेका थिए ।
