झापा । धन होइन, सहयोग गर्ने मन हुनुपर्छ ।
यस्तै उदाहरणका पात्र बनेका छन् भद्रपुरका एक नवदम्पत्ती । मङ्गलवार विवाह बन्धनमा बाँधिएका भद्रपुर नगरपालिका- ६ निवासी मदनकुमार पोखरेल र कचनकवल गाउँपालिका- ६ निवासी सुस्मिता दाहालले धुर्मुस सुन्तली फाउण्डेशनलाई आर्थिक सहयोग र वृद्धवृद्धालाई जाडोको न्याय कपडा वितरण गरी वैवाहिक जीवनको सुखद सुरुवात गरेका छन् ।
बाग्मती सरसफाइ अभियानका अभियन्ता समेत रहेका पोखरेलले विवाहको दोस्रो दिन आफ्नै घरमा एक संक्षिप्त कार्यक्रमको आयोजना गरी धुर्मुस सुन्तली फाउण्डेशनलाई एक लाख रुपैयाँ र नगर क्षेत्रका एक दर्जन वृद्धवृद्धालाई जाडोको न्याय कपडा र नगद रकम वितरण गरेका हुन् ।
नवदम्पतीले प्रदेश सांसद वसन्त बानियाँलाई धुर्मुस सुन्तली फाउण्डेशनलाई प्रदान गरिएको एक लाखको चेक हस्तान्तरण गरेका हुन् । सो रकम सांसद बानियाँले फाउन्डेसनको खातामा पठाइदिने बताइएको छ ।
साथै नवदम्पत्तीले भद्रपुरका १०२ वर्षीय वृद्धा सुभद्रा कार्कीसहित एक दर्जन वृद्धवृद्धालाई जाडोमा लगाउने टोपी, ओडनेसहित नगद रकम वितरण गरेका थिए ।
वैवाहिक कार्यक्रममा बोलाएर सहयोग गरेको भन्दै वृद्धवृद्धाहरुले नवदम्पतीलाई आर्सीवाद दिँदै सफल दम्पती जीवनको शुभकामना समेत दिएका थिए ।
नागरिक स्तरबाटै धुर्मुस सुन्तली फाउन्डेसनले चितवनको भरतपुर महानगरपालिका- १५ मा गौतम बुद्ध नमुना क्रिकेट रङ्गशाला निर्माण गरिरहेकोले वैवाहिक जीवनको विशेष अवसरमा सो रकम प्रदान गरिएको उनले बताए ।
सामाजिक अभियन्ताको हैसियतले समाजमा केही गर्नुपर्छ भावना बोकेर ज्येष्ठ नागरिकका लागि जिल्लामै उत्कृष्ट मनोरञ्जन पार्क भविष्यमा बनाउने सङ्कल्प गरेको उनले धारण समेत व्यक्त गरे ।
अभियन्ता पोखरेलसहित उनका बुबा नेत्रप्रसाद र आमा बिकुरादेवी पोखरेलले यसअघि कोरोना भाइरसको महामारीपछि लगाइएको लकडाउनको समयमा विपन्न परिवारजनलाई खाद्यान्न सामग्री समेत वितरण गरेका थिए ।
