बाहुण्डाँगी जेसीजले आयोजना गरेको शाखास्तरीय अन्तर जेसीज हाजिरीजवाफ प्रतियोगिताको उपाधि चारआली जेसीजले जितेको छ ।
१४ औँ स्थापना दिवसको अवसर पारेर बाहुण्डाँगी जेसीजले शनिबार मेचीनगर-४ स्थित बाहुण्डाँगी सामुदायिक भवनमा सम्पन्न हाजिरीजवाफको विजेता चारआली जेसीजले नगद पाँच हजारसहित प्रमाण-पत्र र मेडल प्राप्त गरेको हो ।
त्यसैगरी प्रतियोगितामा सुरुङ्गा जेसीजले दोस्रो स्थान, भद्रपुर जेसीज तेस्रो तथा धुलाबारी जेसीज चौथो भएका छन् । दोस्रो, तेस्रो र चौथो हुने टोलीले क्रमशः नगद तीन, दुई र एक हजारसहित ट्रफी तथा मेडल प्राप्त गरेका छन् ।
जेसीजका ८ शाखा सहभागी हाजिरीजवाफ प्रतियोगिताको सञ्चालन धुलाबारी जेसीजका पूर्व अध्यक्ष केशव पोखरेलले गरेका थिए ।
विजेता उपविजेतालाई बाहुण्डाँगी जेसीजका लागि निरुपित उपाध्यक्ष बहादुर तामाङ, नेपाल जेसीज वर्ष २०२४ का राष्ट्रिय उपाध्यक्ष योगेश राजवंशी, वर्ष २०२४ एरिया ‘ए’ का तालिम संयोजक प्रदिप विष्ट, मेचीनगर लेडी जेसीजका पूर्व अध्यक्ष शोभा श्रेष्ठ नेम्बाङ, बाहुण्डाँगी जेसीज वर्ष २०२४ का अध्यक्ष देबु बानियाँ, पूर्व अध्यक्षहरु बद्री निरौला, पुष्कर ढकाल, कञ्चन उप्रेती, बोर्ड प्रमुख सल्लाहकार समिर राईलगायतले पुरस्कार वितरण गरेका थिए ।
बाहुण्डाँगी जेसीज वर्ष २०२४ का अध्यक्ष देबु बानियाँको सभापतित्वमा भएको कार्यक्रममा मेचीनगर नगरपालिकाका निवर्तमान नगर प्रमुख विमल आचार्यको प्रमुख आतिथ्यता रहेको थियो ।
उक्त कार्यक्रममा मेचीनगर-४ का वडाध्यक्ष अर्जुनकुमार कार्की, नेपाल जेसीज वर्ष १९९५ का राष्ट्रिय अध्यक्ष सिनेटर अनिल भेट्वाल, वर्ष २०१७ राष्ट्रिय अध्यक्ष सिनेटर प्रकाशप्रसाद अधिकारी, वर्ष २०२० का राष्ट्रिय अध्यक्ष सिनेटर अशोक शंकर, निरुपित उपाध्यक्ष जेसी बहादुर तामाङ, नेपाल जेसीजका पूर्व कार्यकारिणी उपाध्यक्ष जेसी रिता न्यौपाने, बाहुण्डाँगी जेसीज वर्ष २०१३ का अध्यक्ष जेसी बद्री निरौला, धुलाबारी जेसीजका पूर्व अध्यक्ष लिलाप्रसाद भण्डारी, मातृ शाखा धुलाबारी जेसीजका अध्यक्ष जेसी मञ्जिल रसाइलीलगायतले शुभकामना मन्तव्य राखेका थिए ।
कार्यक्रम संयोजक नित्यानन्द चम्लागाईंले मन्तव्यबाट स्वागत गरेको कार्यक्रमको सञ्चालन कार्यकारिणी उपाध्यक्ष सुष्मा मिश्रले गरेकी थिइन् ।
