झापा ।जिल्लाको सदरमुकाम भद्रपुरमा माता दुर्गा भवानीको विशेष पूजा अर्चनाका गर्दै धूमधामका साथ फूलपाती भित्राइएको छ । नेपालीहरूको महान् चाड बडा दसैँ सुरुसँगै आज महासप्तमीको दिन पारेर भद्रपुरमा फूलपाती धूमधामका साथ भित्राइएको हो ।
कोरोना महामारीले अघिल्लो वर्ष फूलपाती भित्राउने कार्यक्रम स्थगित भएपछि यसबर्ष भव्य रुपमा फूलपाती भित्राउने कार्यक्रमको आयोजना गरिएको छ ।
भद्रपुर नगरपालिका- ६ स्थित सार्वजनिक दुर्गा मन्दिर समितिले मन्दिरमा परिसरमा आयोजना गरेको कार्यक्रममा झापाका प्रमुख जिल्ला अधिकारी श्रवणकुमार तिमिल्सिनाले माता दुर्गा भवानीको विशेष पूजा अर्चना गरेका थिए ।
सोही अवसरमा नेपाली सेना, नेपाल प्रहरी र सशस्त्र प्रहरीले संयुक्त रुपमा दुर्गा मातालाई चार पटक सलामी अर्पण गरेका थिए ।
मन्दिरमा पूजा अर्चना पश्चात् जिल्ला स्तरीय प्रहरी, प्रशासन प्रमुख, सरकारी कार्यालयका प्रमुख, नागरिक समाज, बालबालिका, आयोजक समिति, लगायतको सहभागितामा बाजागाजा सहित निकालिएको रयाली भद्रपुर बजार परिक्रममा गर्दै भद्रपुर भन्सार कार्यालयमा पुगेर फूलपाती भित्राइएको थियो ।
धार्मिक परम्परा अनुसार भन्सारमा परिसरमा विशेष पूजामा प्रमुख जिल्ला तिमिल्सिनाले पुनः पूजापाठ, जमरा, होम, बलि तथा बढाइँ दिएका थिए । त्यहाँ पनि नेपाली सेना बन्दुक पड्काएर सलामी दिएका थिए ।
कार्यक्रममा आयोजक समितिका संयोजक गोपाल अग्रवाल, प्रदेश सांसद ओमप्रकाश सरावगी, भद्रपुर नगरपालिकाका उपप्रमुख चन्द्रामाया श्रेष्ठ, प्रहरी कार्यालय झापाका एसपी सानुराम भट्टराई, सशस्त्र प्रहरी बल नेपाल, झापा गण नम्बर २ का एसपी रमेशकुमार पाण्डे, राष्ट्रिय अनुसन्धानका उप निर्देशक तिलक पाण्डे लगायत जनप्रतिनिधि, उद्योगी, व्यापारी, नगरवासी, पत्रकारको उपस्थिति रहेको थियो ।
