काठमाडौं । अर्जेन्टिनाका स्टार खेलाडी लियोनल मेसीले आज पीएसजीबाट डेब्यू गर्ने पक्का भएको छ । पीएसजीले आज रेइम्सविरुद्धको खेलका लागि सार्वजनिक गरेको २२ सदस्सीय टोलीमा मेसीको नाम समावेश गरेको छ ।
मेसी यसै सिजन स्पेनिस ला लिगाको क्लब बार्सिलोनाबाट ‘फ्री ट्रान्सफर‘मा पीएसजीसँग अनुबन्ध भएका थिए । मेसीले अहिलेसम्म क्लब फुटबलमा बार्सिलोनाबाहेक अरूको जर्सी लगाएका छैनन् । त्यसकारण सबै समर्थकको ध्यान मेसीमा केन्द्रित छ ।
पीएसजीले मेसीसँगै रेइम्सविरुद्धको टोलीमा नेइमार र एमबाप्पेलाई पनि समावेश गरेको छ । एमबाप्पे यसै सिजन रियाल मड्रिड जान लागेको चर्चा छ । तथापि, शनिबार प्रशिक्षक माउरिसियो पोचेट्टिनोले एमबाप्पले आफूलाई रियाल जानेबारे केही नभनेको बताएका थिए ।
रियल मड्रिडबाट यसै सिजन पीएसजीमा अनुबन्ध भएका सर्जियो रामोस भने टोलीमा छैनन् । चोटबाट ग्रसित रामोस अझै फिट भइसकेका छैनन् ।
रेइम्सविरुद्ध नेइमार, एमबाप्पे र मेसीले पीएसजीको आक्रमण पङ्क्ति सम्हाल्ने सम्भावना बलियो छ ।
