युरोकपमा क्वाटरफाइनलका खेलहरु आजबाट
असार १८, काठमाडौं । १६ औं संस्करणको युरोकप फुटबलको क्वाटरफाइनल खेलहरु आज (शुक्रबार) बाट सुरु हुँदैछन् । क्वाटरफाइनल खेल अन्तर्गत आज दुई खेल हुनेछन् ।
पहिलो क्वाटरफाइनलमा स्विट्जरल्यान्ड र स्पेन खेल्नेछन् । दुई टोलीबीचको खेल रुसको सेन्ट पिटर्सवर्ग स्टेडियममा हुनेछ । स्विट्जरल्यान्ड र स्पेनबीचको खेल नेपाली समय अनुसार राति ९ः४५ बजे सुरु हुनेछ ।
आजको खेलमा दुबै टोली जित निकाल्दै अन्तिम चारमा पुग्ने योजनामा हुनेछन् । सेमिफाइनलमा दुबै टोलीको नजर हुनेछ । प्रतियोगिताको पहिलो क्वाटरफाइनल खेल निकै रोमाञ्चक हुने अपेक्षा गरिएको छ ।
स्वीजरल्यान्ड साविक उपविजेता फ्रान्सलाई हराउँदै क्वाटरफाइनलमा प्रवेश गरेको हो । यता, युरोकप फुटबलको सर्वाधिक सफल टोलीको रुपमा रहेको स्पेन पनि आजको खेलमा सहज जित निकाल्दै प्रतियोगितामा बलियो टोलीको रुपमा प्रस्तुत गर्ने योजनामा छ ।
तीन पटकको च्याम्पियन स्पेनले क्रोएसियालाई हराएर अन्तिम आठको यात्रा तय गरेको हो । स्विट्जरल्यान्ड र स्पेनबीच युरोपियन च्याम्पियनसिपमा पहिलोपटक प्रतिस्पर्धा हुन लागेको हो ।
दुई टिमबीच अहिलेसम्म २२ खेलमा प्रतिस्पर्धा भएको छ । जसमा स्पेनले १६ खेल जितेको छ । पाँच खेल बराबरीमा सकिदा एक खेल स्विट्जरल्यान्डले जितेको छ ।
आज नै दोस्रो खेलमा बेल्जियम र इटाली प्रतिस्पर्धा गर्ने छन् । जर्मनीको एलिनाज स्टेडियममा हुने दोस्रो क्वाटरफाइनल खेल नेपाली समय अनुसार राति १२ः४५ बजे सुरु हुनेछ ।
दुबै टोली उपाधि दावेदार हुन् । आजको खेलमा जित निकाल्ने टोली उपाधि होडका लागि बलियो दावेदार मानिनेछ । विश्व वरीयतामा शीर्ष स्थानमा रहेको बेल्जियम प्रतियोगितामा अपराजित छ ।
बेल्जियमले साविक विजेता पोर्चुगललाई हराएर अन्तिम आठको यात्रा तय गरेको थियो । इटालीले क्वाटरफाइनलमा प्रवेश गर्ने क्रममा अष्ट्रियालाई हराएको थियो । दुई टिमबीच हालसम्म २२ खेल भएको छ । जसमा इटालीले १४ खेल जितेको छ । चार खेल बेल्जियमले जित्दा ४ खेल बराबरीमा सकिएको छ ।
बाह्रखरी
