काठमाडौं । अर्थ मन्त्रालयले चालु आर्थिक वर्षको आर्थिक वृद्धिदरबाहेक अर्थतन्त्रका अन्य सूचक सकारात्मक रहेको दाबी गरेको छ ।
शुक्रबार चालु आर्थिक वर्षको आर्थिक सर्वेक्षण सार्वजनिक गर्ने कार्यक्रममा अर्थ मन्त्रालयका सचिव शिशिरकुमार ढुंगानाले विदेशी विनिमय सञ्चिति, मुद्रास्थिति नियन्त्रित अवस्था, आयात निर्यातका सूचक सकारात्मक रहेको बताए । राजस्व संकलनको स्थिति सकारात्मक र रेमिट्यान्सको वृद्धि हुँदा आर्थिक वृद्धिदरबाहेक अर्थतन्त्रका समष्टिगत सूचकहरु सकारात्मक रहेको बताए ।
उनले चालु खाता घाटा संकुचित भए पनि ‘टोलरेट लिमिट’मा रहेको दाबी गरे । “यसले रिभाइभलका कार्यक्रम सञ्चालन गर्नका लागि केही असर गर्न सक्ने अवस्था छैन । यसले निजी क्षेत्रको विश्वास आर्जन गर्न सकिने गरी र अर्थतन्त्रलाई पार्न सक्ने थप चापलाई व्यवस्थापन गर्न सकिने गरी टोलरेट लिमिटमा भएकाले यसले निजी क्षेत्रको लगानी विस्तारमा, निजी क्षेत्रको व्यावसायिक विकासमा र आर्थिक पुनरुत्थानका कार्यक्रमहरुलाई असर पर्न सक्ने अवस्थामा रहेको छैन । यो नियन्त्रित सीमामै छ,” उनले भने ।
उनले अर्थतन्त्र फेरि संकुचनमा जाने अवस्था नरहेको पनि दाबी गरे । गत आर्थिक वर्षको आर्थिक वृद्धि ऋणात्मक बनेको थियो । “जीडीपीको वृद्धिदर ७ प्रतिशत राख्दा त्यो पाटोमा हामी पछाडि छौँ, अरु सूचक कम्फटेबल जोनमा छौँ । हाम्रो लक्ष्यकै हाराहारीमा छौँ,” उनले भने । आर्थिक वृद्धिदरबाहेक अर्थतन्त्रमा जोखिमको अवस्था सिर्जना भइनसकेको उनले बताए । उनले भने, “हामी व्यवस्थापन गर्न सक्ने स्थितिमा छौं ।”
अर्थमन्त्री विष्णुप्रसाद पौडेलले ४.१ प्रतिशतको आर्थिक वृद्धि हासिल गर्ने संशोधित अनुमान पनि हासिल गर्न भने चुनौतीपूर्ण रहेको बताए । कोभिड–१९ महामारीको दोस्रो लहरका कारण आर्थिक वृद्धिको लक्ष्य हासिल गर्न चुनौती देखिएको उनले बताए ।
