काठमाडौं । काठमाडौंको शंखरापुरमा होली खेल्ने क्रममा एसिड छ्याप्दा तीन जना बालक घाइते भएका छन्।
आइतबार दिउँसो शंखरापुर नगरपालिका १ चापाकोटमा होली खेल्ने क्रममा एसिड छ्याप्दा तीन जना घाइते भएको महानगरीय प्रहरी परिसर काठमाडौंका प्रहरी वरिष्ठ उपरीक्षक एसएसपी अशोक सिंहले जानकारी दिए।
घाइते हुनेमा ९, ११ र १६ वर्षका बालक छन्।
प्रहरीले घटनामा संलग्न भएको आरोपमा दुई जनालाई पक्राउ गरेको छ। पक्राउ पर्नेमा १७ वर्षिय पवन पहाडी र १८ वर्षका आकाश तामाङ छन्।
उनीहरूले होली खेल्ने क्रममा पानी भनेर एसिड फ्याकेका थिए।
होली खेल्ने क्रममा डेरीमा दुधको फ्याट लेभल चेक गर्न प्रयोग हुने सल्फरिक एसिड जर्किनमा राखेको थियो। उनीहरूले पानी होला भनेर छ्यापे, तर एसिड रहेछ, एसएसपी सिंहले बताए।
घाइते बालकहरूको सुस्मा कोइराला मेमोरियल अस्पतालमा उपचार भइरहेको छ। उनीहरूको हात, अनुहार र कम्मरमा एसिडले लागेको एसएसपी सिंहले बताए।
परिसरले आइतबार होलीमा २५ सय प्रहरी परिचालन गरेको थियो। प्रहरीले दुई सय बढीलाई नियन्त्रणमा लिएको थियो। उनीहरूलाई स्क्रिनिङ गरिरहेको एसएसपी सिंहले जानकारी दिए ।
सेतोपाटी
