झापाको बिर्तामोड नगरपालिकाको आयोजनामा सार्वजनिक सुनुवाई कार्यक्रम सम्पन्न भएको छ ।
बिर्तामोड-२ स्थित चारपानेमा आज आयोजित कार्यक्रममा बोल्दै नगर प्रमुख पवित्रा महतारा प्रसाईंले सरकारी नीति तथा प्रक्रियाका कारण केही विकास निर्माणका कामहरू अपेक्षित रूपमा अघि बढाउन कठिनाइ हुने गरेको बताएकी छन् ।
नगरपालिकाले आह्वान गरेको बालुवा-गिटीको ठेक्काको सन्दर्भमा बोल्दै उनले कुनै पनि आवेदन नपरेकाले नगरवासीलाई आवश्यक गिटी उपलब्ध गराउन समस्या भएको स्पष्ट पारेकी हुन् ।
नगर प्रमुख प्रसाईंका अनुसार गिटीको सरकारी दर प्रति टिपर ७ हजार २ सय ५० रुपैयाँ (७.५ घनमिटर)भए पनि महँगीको कारण भाउ बढेकोले भ्याटसमेत जोडिँदा मूल्य करिब ९ हजार रुपैयाँ पुग्ने अवस्था छ । तर नीतिगत व्यवस्थाका कारण बजेट थप गर्न नसकिएकाले समस्या उत्पन्न भएको उनले बताइन् ।
त्यसैगरी नगर उपप्रमुख नगेन्द्रप्रसाद सङ्ग्रौलाले नगरपालिकाले हालसम्म हासिल गरेका विकासका उपलब्धि तथा सामना गरिरहेका चुनौतीबारे सहभागीहरूलाई जानकारी गराएका थिए ।
कार्यक्रममा विभिन्न टोल विकास संस्थाका पदाधिकारी तथा प्रतिनिधिहरूले सडक निर्माण तथा स्तरोन्नति, ढल निकास, लागूऔषध नियन्त्रण, पैनी व्यवस्थापन, विद्युत् सेवा, फोहोर व्यवस्थापन लगायतका विषयमा जनप्रतिनिधिसमक्ष जिज्ञासा तथा सुझाव प्रस्तुत गरेका थिए।
उठाइएका प्रश्नहरूको जवाफ वडा नं.२ का वडाध्यक्ष किशोर पौडेल र नगरपालिकाका प्रमुख प्रशासकीय अधिकृत सागर मिश्र लगायतले दिएका थिए ।
