इनिशा विक हत्या प्रकरणको छानविन र दोषीलाई कडा कारवाहीको माग गर्दै पूर्वीनाका काँकरभिट्टामा खबरदारी सभा सम्पन्न गरिएकाे छ ।
प्रगतिशील युवा क्लब धुलाबारीकाे अगुवाइमा भएको खबरदारी सभामा मेचीनगरका विभिन्न सामाजिक संघसंस्था, क्याम्पस, स्कुलका विद्यार्थी लगायतले इनिशाका हत्याराहरूलाई कडा भन्दा कडा कारवाही गर्न माग गर्दै काँकरभिट्टा बजारमा माैन र्याली प्रदर्शन गरेका थिए ।
क्लबका अध्यक्ष विशाल कार्कीकाे अध्यक्षतामा भएको खबरदारी सभामा सहभागीहरूले इनिशा विकको हत्यारालाई कारवाही गर, बालबालिका माथि हुने हिंसा अन्त्य गर, पितृसत्ता मुर्दावाद, बलात्कारी जन्माउने व्यवस्थालाई ध्वस्त पारौं लगायत लेखिएका प्लेकार्ड प्रदर्शन गरेका थिए भने र्यालीपछि इलाका प्रहरी कार्यालय नजिकै सडकमा काेण सभा गरिएको थियाे ।
क्लबका सचिव करूणा पाेखरेलले सञ्चालन गरेको काेण सभामा सामाजिक अभियन्ता राधा प्रधान कार्की, पूजा सापकाेटा, शिक्षक शुभद्रा भट्टराई, पत्रकार अम्बिका भण्डारी, अभियन्ता विनय कार्कीले गम्भीर ढंगले विक हत्या प्रकरणको छानविनका साथै घटनामा संलग्नलाई दाेषीलाई कडा कारवाही र यस्ता घट्नाहरू दाेहाेरिन नदिन सबै सचेत हुनु पर्नेमा जाेड दिएका थिए ।
सुर्खेतको वीरेन्द्रनगरस्थित सामुदायिक वनमा गत फाल्गुन २३ गते इनिशा मृत अवस्थामा भेटिएकी थिइन् । पोस्टमार्टम रिपोर्टमा बलात्कारपछि अत्यधिक रक्तस्रावका कारण उनको मृत्यु भएको देखिएपछि प्रहरीले अनुसन्धान जारी राखेको छ ।
