झापाको गरामनी बजारस्थित मन्दिर छेउमा निर्माण गरिएको ‘नागरिक भेटघाट चौतारी’ उद्घाटन गरिएको छ ।
समाजसेवी तथा पूर्व शिक्षासेवी खिलप्रसाद शिवाकोटीको अगुवाईमा ‘नागरिक भेटघाट चौतारी’ निर्माण गरिएको थियो । चौतारी उद्घाटनसँगै साहित्यिक कार्यक्रम समेत गरिएको छ ।
अगुवाईकर्ता खिलप्रसाद शिवाकोटी अध्यक्षतामा भएको कार्यक्रममा राष्ट्रिय सहकारी बैंकका अध्यक्ष महेन्द्रकुमार गिरीले चौतारीको एकछेउमा स्थापित गौतम बुद्धको सालिक अनावरण गरेका थिए ।
त्यसैगरी ‘नागरिक भेटघाट चौतारी’ लेखिएको बोर्ड बिर्तामोड नगरप्रमुख पवित्रा महतारा र रमेश प्रसाईंले संयुक्त रूपमा अनावरण गर्दै चौतारीको औपचारिक उद्घाटन गरेका थिए ।
उक्त कार्यक्रममा साहित्यिक वातावरण पनि सिर्जना गरिएको थियो । कविहरू केशव आचार्य, देवीचरण भण्डारी, खिलप्रसाद शिवाकोटी, दृष्टिहीन कविद्वय समिर अधिकारी र रमेश प्रसाईंले आफ्ना कविता वाचन गरेका थिए ।
कार्यक्रममा बिर्तामोड नगरपालिकाका कार्यकारी अधिकृत सागर मिश्र, बिर्तामोड शिक्षा प्रमुख तिलचन भण्डारी लगायत विभिन्न सामाजिक, सांस्कृतिक तथा स्थानीय व्यक्तित्वहरूको पनि उल्लेख्य उपस्थिति रहेको कार्यक्रमको सञ्चालन मोहन घिमिरेले गरेका थिए ।
