आईसीसी टी-२० विश्वकप क्रिकेटमा नेपाल इटालीसँग १० विकेटले पराजित भएको छ ।
नेपालले दिएको १२४ रनको लक्ष्य इटालीले १२ ओभर ४ बलमा एक विकेट पनि नगुमाई भेटाएको हो । इटालीका एन्थोनी मोस्काले ६२ र जस्टिन मोस्काले ६० रन बनाए । एन्थोनी र जस्टिन दाजुभाइ हुन् ।
यसअघि भारतको मुम्बईमा रहेको वानखेडे स्टेडियममा टस हारेर ब्याटिङ गरेको नेपालले १९ ओभर ३ बलमा सबै विकेट गुमाएर १२३ रन बनायो । नेपालका आरिफ शेखले २७, कप्तान रोहित पौडेलले २३, आसिफ शेखले २० र करण केसीले नटआउट १८ रन बनाए । इटालीका क्रिशन कालुगामेजले ३ विकेट लिएका थिए ।
प्रतियोगितामा नेपालको यो लगातार दोस्रो हार हो । पहिलो खेलमा नेपाल इङ्ग्ल्यान्डसँग ४ रनले पराजित भएको थियो । यस्तै पहिलो पटक विश्वकप खेलेको इटालीको यो पहिलो जीत हो । इटाली पहिलो खेलमा इटाली स्कटल्यान्डसँग ७३ रनले पराजित भएको थियो ।
यो जीतसँगै इटाली समूह ‘सी’ मा तेस्रो स्थानमा उक्लिएको छ भने नेपाल पुछारमा झरेको छ । योसँगै नेपाल समूह चरणबाटै बाहिरिने अवस्थामा पुगेको छ । अब नेपालले तेस्रो खेलमा वेस्ट इन्डिज र अन्तिम खेलमा स्कटल्यान्डसँग खेल्न बाँकी छ ।
