धरान उपमहानगरपालिकाका प्रमुख हर्क साम्पाङले काठमाडौँ महानगरपालिकाका मेयर बालेन्द्र शाह (बालेन)प्रति तिखो कटाक्ष गरेका छन् ।
बिहीबार सामाजिक सञ्जालमार्फत उनले बालेन संकटको बेलामा लुकेको टिप्पणी गरेका हुन् ।
बालेनलाई जिम्मा लगाइएको अभिमत उनले अरूलाई दिएको हर्कले उल्लेख गरेका छन् । हर्कले फेसबुकमा पोस्ट गरेको स्टाटसमा बालेनको नाम भने उल्लेख गरेका छैनन् ।
अरूले काँधमा बोकिदिओस् भन्ने किसिमको मान्छेलाई नेतृत्व मानिरहेका कारण देशले निकास र विकास नपाएको उनको भनाइ छ ।
“संकटको बेलामा लुक्ने, सडकमा आउन नसक्ने डरपोक, आफूलाई जिम्मा लगाएको अभिमत अरूलाई दिई पठाउने, असहज परिस्थितिको सामना गर्न नसक्ने, अरूले काँधमा बोकिदिवोस् भन्ने किसिमको मान्छेलाई नेतृत्व मानिरहेकै कारण देशले न निकास पायो न विकास ,” हर्कले लेखेका छन् ।
बुधबार हर्कले अन्तरिम सरकारको प्रमुखका विषयमा जंगीअड्डा पुगेर प्रधानसेनापति अशोकराज सिग्देलसित भेटवार्ता गरेका थिए । अन्तरिम सरकारको प्रमुख बन्ने उनको प्रयास जारी छ ।
उनीसहितको प्रयासतर्फ संकेत गर्दै बुधबारै बालेनले सामाजिक सञ्जालमा लेखेका थिए, “…अहिले नै हतारमा नेतृत्वमा आउन चाहनुभएका साथीहरूलाई के भन्न चाहन्छु भने-तपाईंहरूको जोस, तपाईंहरूको सोच, तपाईंहरूको इमानदारिता देशलाई स्थायी रूपमा चाहिएको हो, अस्थायी रूपमा होइन । त्यसका लागि चुनाव त हुन्छ नै । कृपया हतार नगर्नुहोला ।”
