झापामा ‘अभियानका लागि अभियान्ता’ समिति गठन भएको छ ।
कनकाई नगरपालिका-२ स्थित जामूनखाडी सिमसार क्षेत्रमा शुक्रबार भएको झापाका १५ पालिका र इलामको दुई पालिकाबाट प्रतिनिधिमूलक रुपमा उपस्थित २८ जना अभियान्ताहरुको भेलाले ‘अभियानका लागि अभियान्ता समाज’ नामक १२ सदस्यीय तदर्थ समिति गठन गरिएको हो ।
नेपालका वैज्ञानिक डा.महावीर पुनको आत्मकथा ‘महावीर पुन, सपना, सम्झना र अभिरल यात्रा’ पुस्तक बेच्ने क्रममा झापाका १५ पालिकाहरु तथा इलाम जिल्लाका माई र चुलाचुली गरी दुई पालिकाहरुबाट जोडिएका अभियान्ताहरुको पुस्तक बिक्रि अभियानको अनुभव साटासाट गर्दै उपस्थित भेलाले समिति गठन गरेको हो ।
नवगठित समितिको संयोजकमा प्रकाश गुरुङ (बिर्तामोड) र सचिवमा केशव मैनाली (बिर्तामोड) चयन भएका छन् ।
त्यस्तै सदस्यहरुमा सन्तोष दुलाल (दमक), देवेन्द्रराज आङ्दाङबे (कमल), मोहन थापा (कनकाई), काजी राउत (झापा), कमल बाँनिया (बाह्रदशी), सागर घिमिरे (अर्जुनधारा), सुजित बराल (बुद्धशान्ति), बुद्धिराज लिम्बु (माई), कुमार राई (चुलाचुली) र केवल राई (मेचीनगर) रहेका छन् भने आवश्यता अनुसार अन्य पालिकाहरुबाट समेत पछि थप गरी समिति विस्तार गर्ने निर्णय भएको अभियान्ता केशव मैनालीले जानकारी दिए ।
आत्माकथाको पुस्तक बिक्री झापासहित ४३ जिल्लामा सम्पन्न भई सकेको छ भने झापामा मात्रै ३० हजारभन्दा बढी पुस्तकहरु बिक्री भएको थियो । यो हालसम्म बिक्री सम्पन्न भईसकेका जिल्लाहरु मध्ये सबैभन्दा बढी हो । भेलाले समिति गठनसँगै भोलिका दिनहरुमा सार्वजनिक हितका सामाजिक गतिविधिहरु सञ्चालन गर्ने निर्णयसमेत गरेको छ ।
सामूहिक अध्यक्षतामा भएको भेलाको सहजीकरण केशव मैनालीले गरेका थिए ।
