झापाको बिर्तामोड नगरपालिकाले २४ जना कृषकहरुलाई समर्थन मूल्य रकम हस्तान्तरण गरेको छ ।
नगरपालिकाको सभाहलमा आज आयोजित एक कार्यक्रमका बीच नगर प्रमुख पवित्रा महतारा प्रसाईले १२ लाख ८१ हजार ८ सय ८७ रुपैयाँ बराबरको चेक हस्तान्तरण गरेकी हुन् ।
समर्थन मूल्य प्राप्त गर्ने कृषकहरु मध्ये सबैभन्दा थोरै २ सय ८ रुपैयाँ प्राप्त गर्ने वडा नं.७ का रविन बराल र सबैभन्दा धेरै ५ लाख ३४ हजार ५ सय ११ रुपैयाँ प्राप्त गर्ने वडा नं ७ कै प्रदिप खनाल रहेका छन् । समर्थन मूल्यको भुक्तानी कार्यविधि माघ १५ गते बसेको कार्यपालिका बैठकबाट पास गरेर रकम भुक्तानी गरिएको हो ।
नगरका कृषि शाखा प्रमुख राजेन्द्रप्रसाद कडरियाका अनुसार एक वर्षको अवधीमा मुख्य संकलन केन्द्रबाट ७३ लाख २३ हजार ५ सय ४० रुपैयाँ बराबरको तरकारी बिक्री गरेको छ । यस अवधिमा संकलन केन्द्रमा विभिन्न प्रकारका २ लाख ७६ हजार ३ सय २४ किलो तरकारी प्राप्त भएको छ ।
उक्त कार्यक्रममा आवद्द व्यवसायिक तरकारी उत्पादन गर्ने कृषकको संख्या १ सय १७ जना छ । जसमध्ये मुख्य संकलन केन्द्रमा तरकारी विक्री गर्ने कृषकको संख्या ६७ जना छ । बिर्तामोडमा तरकारीको न्युनतम समर्थन मूल्य प्रतिकिलो काउली २६, बन्दा २४, ब्रोकाउली ३५, खुर्सानी ५४, घिरौंला २६, करेला ३२, भाण्टा २६, सिमी ४६, काँक्रा २५, भिण्डी ३६, फर्सी ३१, स्क्वास फर्सी २५, भेडे खुर्सानी ५१, बोडी ३०, लौका २७ टमाटर ३० रुपैंया छ ।
बिर्तामोडमा गएको आर्थिक वर्षदेखि ‘पारीको होइन बारीको खाउँ’ भन्ने मुख्य नाराका साथ एउटा मुख्य संकलन केन्द्र र विभिन्न वडामा गरेर ७ वटा विक्री केन्द्र सञ्चालनमा छन् । तरकारी उत्पादनमा मुख्य जोड दिएको बिर्तामोड नगरपालिकाले तरकारी ढुवानीको लागि २६ लाख रुपैयाँमा कृषि एम्बुलेन्ससमेत खरिद गरिसकेको छ । यसमा संघिय सरकार र बिर्तामोड नगरपालिकाको बराबर लगानी छ ।
कार्यपालिका सदस्य तथा कृषि विकास शाखा संयोजक संगिता सिवाको अध्यक्षतामा आयोजित कार्यक्रममा नगर उपप्रमुख नगेन्द्रप्रसाद संग्रौला, प्रमुख प्रशासकीय अधिकृत सागर मिश्र, कृषि विज्ञ राजेन्द्र प्रसाद उप्रेती, कृषि ज्ञान केन्द्र झापाका प्रमुख सागर विष्ट, प्रधानमन्त्री कृषि आधुनिकिकरण कार्यक्रम झापाका प्रमुख रविन्द्र सुवेदी लगायत जनप्रतिनिधि तथा कृषकहरुको उल्लेखनिय सहभागिता रहेको थियो ।
