प्रेस क्लब मेचीनगरले सदस्यहरुको नि:शुल्क सामुहिक दुर्घटना बीमा गरिदिएको छ ।
आज क्लबको स्थापना दिवसको अवसरमा ३९ जना सदस्य पत्रकारहरुको नि:शुल्क सामुहिक दुर्घटना बीमा गरिदिएको हो ।
हरेक वर्ष नविकरण हुने गरी ३९ जनाको २ लाख दरले ७८ लाख बराबरको दुर्घटना बीमा गरिएको प्रेस क्लबका सचिव प्रविण अधिकारीले जानकारी दिए ।
नेपाल माइक्रो इन्स्योरेन्स बिर्तामोडमार्फत पत्रकारको दुर्घटना बीमा गरिएको हो । बीमा कम्पनीका बिर्तामोड शाखा प्रमुख दिपक काफ्ले र प्रेस क्लबका मेचीनगरका अध्यक्ष प्रकाश पौडेले सम्झौता पत्रमा हस्ताक्षर गरी सम्झौता गरेसँगै बीमा समेत लागू भएको छ ।
प्रेस क्लब मेचीनगरमा ६० पत्रकार आवद्ध छन् । त्रमिकरुपमा सबै सदस्यको नि:शुल्क सामुहिक दुर्घटना बीमा गरिने उपाध्यक्ष खगेन्द्र घिमिरेले बताए ।
दुई पत्रकार पुरस्कृत
यसैबीच सोही अवसरमा दुई जना पत्रकार पुरस्कृत भएका छन् ।
११ हजार १११ को पत्रकारिता पुरस्कार पत्रकार मुक्ति पौडेललाई र ५ हजारको प्रोत्साहन पुरस्कार किशोर उपरकोटीलाई प्रदान गरिएको थियो ।
प्रेस क्लब मेचीनगरका अध्यक्ष प्रकाश पौडेलको अध्यक्षतामा भएको कार्यक्रमका प्रमुख अतिथि नेपाली कांग्रेसका महामन्त्री एवम् झापा क्षेत्र नं.१ का सांसद विश्वप्रकाश शर्मा, मेचीनगर नगरपालिका प्रमुख गोपालचन्द्र बुढाथोकी, उपप्रमुख मीना पोखरेल उप्रेती, झापाका प्रमुख जिल्ला अधिकारी गोपालप्रसाद अधिकारी, नेपाल पत्रकार महासंघ झापा शाखाका अध्यक्ष एकराज गिरी, क्लबका संस्थापक अध्यक्ष सन्तोष आचार्य लगायतले शुभकामना मन्तव्य राखेका थिए ।
उक्त कार्यक्रममा भारतको सिलगुडी जर्नालिस्ट क्लब पश्चिम बंगाल, काँकरभिट्टा पर्यटन बोर्ड सहितको सहभागितामा पर्यटकको सुरक्षा र पत्रकारिता विषयक अन्तरसंवाद सम्पन्न गरिएको छ ।
उपाध्यक्ष खगेन्द्र घिमिरेले मन्तव्यबाट स्वागत गरेका कार्यक्रमको सञ्चालन सचिव प्रविण अधिकारीले गरेका थिए ।
