इलामको सूर्योदय नगरपालिकाको करफोकमा पर्यटन पत्रकारिता तालिम सुरु भएको छ ।
पत्रकारहरुको क्षमता विकासका लागि तीन दिने तालिम सुरु भएको हो ।
नेपाल पत्रकार महासंघ झापा शाखाको आयोजना, पर्यटन पत्रकार मञ्च झापाको समन्वय तथा पर्यटन कार्यालय काँकरभिट्टाको सहकार्यमा भएको तालिमको एक कार्यक्रमका बीच प्रतिनिधिसभा सदस्य महेश बस्नेतले तालिमको उद्घाटन गरेका छन् ।
तालिमको उद्घाटन गर्दै बस्नेतले प्रकृति र संस्कृतिको प्रवर्धन गरे मात्र पर्यटनको विकास सम्भव रहेको जिकिर गरे । पर्यटकीय क्षेत्रको विकास र उजागरका लागि तीन तहकै सरकारको समन्वय अनिवार्य रहेको उनको भनाइ थियो ।
पत्रकार महासंघ झापा अध्यक्ष एकराज गिरीको अध्यक्षतामा भएको उद्घाटन कार्यक्रममा नेपाल पत्रकार महासंघका पूर्व महासचिव चन्द्र भण्डारी, पर्यटन कार्यालय काँकरभिट्टाका पर्यटन अधिकृत निरोज कट्टेल, करफोक खलंगा सामुदायिक होमस्टेका परिकल्पनाकार चन्द्र सापकोटा, पर्यटन पत्रकार मञ्च झापाका अध्यक्ष विनोद पाण्डे लगायतले शुभकामना व्यक्त गरेका थिए ।
तालिमको सहजीकरण पर्यटन कार्यालय काँकरभिट्टाका पर्यटन अधिकृत निरोज कट्टेल, लोकपरिकारका अन्वेषक केदार शर्मा र विराट अनुपम लगायतले गर्ने छन् । तालिममा झापा, इलाम, पाँचथर र ताप्लेजुङका ४० जना पत्रकारको सहभागिता रहेको छ ।
उपाध्यक्ष सुब्रत न्यौपानेले मन्तव्यबाट स्वागत गरेको कार्यक्रमको सञ्चालन सहसचिव तिलक योञ्जनले गरेका थिए ।
