प्रेस क्लब मेचीनगरले आयोजना गरेको तीन दिवसीय एआई सम्बन्धी तालिम आज समापन भएको छ ।
काँकरभिट्टा स्थित नमस्ते पार्टी प्यालेसमा शुक्रबारदेखि सञ्चालन भएको तालिम आइतबार समापन भएको हो ।
समापन कार्यक्रमका प्रमुख अतिथि मेचीनगर नगरपालिकाका प्रमुख गोपालचन्द्र बुढाथोकीले तालिमले नगरवासीको हितमा कलम चल्ने छ भन्ने विश्वास लिएको बताए ।
उनले राज्यको खवरदारी गर्ने मिडियाले एआईबाट सिकेको सीपले यसको दुरुपयोग भन्दा पनि सदुपयोगमा लाग्न आग्रह गरेका छन् ।
मेचीनगर नगरपालिकाको आर्थिक सहयोगमा भएको सम्पन्न कार्यक्रममा प्रेस क्लब मेचीनगरका संस्थापक अध्यक्ष सन्तोष आचार्य, पूर्व अध्यक्ष ज्ञानेन्द्र निरौला, पूर्व अध्यक्ष मुक्ति पौडेल, निवर्तमान अध्यक्ष डम्बर बराल, मेचीनगर सञ्चार प्रतिष्ठानका अध्यक्ष शिशिर चम्लागाई, नगरपालिकाका प्रमुख प्रशासकीय अधिकृत अग्निप्रसाद अधिकारी लगायतको उपस्थिति रहेको थियो ।
प्रेस क्लब मेचीनगरका अध्यक्ष प्रकाश पौडेलको अध्यक्षतामा भएको तालिममा सहभागीलाई पहिलो दिन एआई सम्बन्धी तालिम आमसञ्चार क्षेत्रका विज्ञ भानुभक्त आचार्यले, दोस्रो दिन भिडियो इडिटिङ सम्बन्धी शितल मण्डल र तेस्रो दिन डिजिटल पत्रकारितामा कानूनी जटिलता विषयमा तारामणि सापकोटाले प्रशिक्षण दिएका थिए ।
५० जना भन्दा बढी झापाका पत्रकारहरुको सहभागिता रहेको तालिम सम्पन्न कार्यक्रमको सञ्चालन सचिव प्रविण अधिकारीले गरेका थिए ।
