नेकपा एमाले अछामको अध्यक्ष पदका लागि जारी नवौं जिल्ला अधिवेशनमा कमल रावल बलिया प्रतिस्पर्धीका रूपमा देखा परेका छन् ।
पार्टीको संगठन सुदृढीकरणमा सक्रिय रावल युवा पुस्ताको मुद्दा र आकांक्षालाई सम्बोधन गर्दै पछिल्लो समय अछाममा आफ्नो प्रभाव विस्तार गर्न सफल भएका छन् । विद्यार्थी राजनीतिबाट उदाएका रावल दुई कार्यकालसम्म एमाले सुदूरपश्चिम प्रदेश कमिटी सदस्य रहेका छन् ।
पार्टी अध्यक्ष तथा प्रधानमन्त्री केपी शर्मा ओली र महासचिव शंकर पोखरेलको समर्थन प्राप्त भएपछि उनले अध्यक्ष पदका लागि थप आत्मविश्वासका साथ प्रतिस्पर्धा गरिरहेका छन् ।
आगामी २०८४ सालमा हुने आमनिर्वाचनलाई लक्षित गर्दै रावलले अछाममा पार्टीलाई पहिलो शक्ति बनाउन अध्यक्ष पदमा उम्मेदवारी दिएको बताएका छन् ।
पार्टीको अहिलेको लक्ष्य मिसन ८४ हो रावलले भने,`जिल्लामा एमालेलाई पहिलो बनाउने र पार्टीमाथि भइरहेको आक्रमणलाई काम गरेर निस्तेज पार्न मेरो उम्मेदवारी हो ।`
युवा प्रतिनिधित्वलाई सशक्त बनाउने र संगठनलाई मजबुत बनाउन नेतृत्वको आवश्यकता महसुस गर्दै आफूले अनुभव, संघर्ष र विश्वासका आधारमा उम्मेदवारी दिएको रावलले बताएका छन् ।
रावलको उम्मेदवारीले जिल्ला अधिवेशनमा नयाँ ऊर्जा थपेको छ । संगठनात्मक अनुभव, सफल नेतृत्व क्षमता र युवामैत्री सोचका कारण प्रतिनिधिहरूले उनको उम्मेदवारीलाई सकारात्मक रूपमा लिएका छन् । भावी नेतृत्व सशक्त र परिणाममुखी बनाउने सम्भावनाका साथ रावलको नाम अधिवेशनमा प्राथमिकतामा राखेर चर्चा भइरहेको छ ।
