झापाको कनकाई नगरपालिकामा अवस्थित घैलाडुब्बाका दुर्गाचरण राजवंशी आफनो कला प्रस्तुत गरेर जिवीकोपार्जन गरिरहेका छन् । उनले कला घर नामक व्यवसाय दर्ता गरेर विशेषत: विद्यालय, संघसंस्था, सरकारी कार्यालय, खेल मैदानहरुमा विभिन्न आर्कषक किसिमका चित्रहरु बनाउँदै आएका छन् ।
नेपाल कमरसियल आर्टिष्ट संघको केन्द्रीय उपाध्यक्षसमेत रहेका राजवंशी यही पेशामा रमाउँदै आएका छन् ।
विगत ३२ वर्ष अगाडिदेखि यो पेशामा लागेका उनले आफनो सम्पूर्ण परिवारको जिवीकोपार्जन यसैमार्फत गर्दै आएको राजवंशी बताउँछन् ।
उनले आफूले मात्र नभएर अन्य १० जनालाई रोजगार पनि दिइरहेका छन् । उनले गाडीको नम्बर प्लेट लेख्नेदेखि लिएर बालबालिकाका संस्कृति झल्कने चित्रहरु बनाउँदै आएका छन् ।
उनी नेपाल वादेरो कराँते संघको प्रदेश उपाध्यक्ष समेत रहेका छन् । खेलकुदमा समेत उतिकै अब्बल रहेका राजवंशी खेल क्षेत्रलाई पनि उतिकै माया गर्नुका साथै विभिन्न ठाउँमा गएर प्रशिक्षणसमेत दिँदै आएका छन् ।
राजवंशी वैदेशिक रोजगारीको सिलसिलामा कतारमा ३ वर्ष र मलेसियामा ४ वर्ष बिताएर स्वदेशै फर्केर आफनै पेशा अँगालेर सोही व्यवसायमा रमाउँदै छन् ।
विदेशको कमाइभन्दा नेपालमै आफनो सिप कला बेचेर पहिचान बन्ने भएकाले यो पेशामा लागेको राजवंशी बताउँछन् ।
