आईसीसी १९ वर्षमुनिको विश्वकप एशिया छनोटमा नेपालले विजयी सुरुआत गरेको छ ।
मूलपानी मैदानमा आज भएको खेलमा नेपालले यूएईलाई डीएलएस मेथडका आधारमा ५ रनले हराएको हो ।
नेपालले दिएको २०१ रनको लक्ष्य पछ्याएको यूएईले ३६ ओभरमा ७ विकेट गुमाएर १ सय ७१ रन बनाएको अवस्थामा खेल खराब प्रकाशका कारण रोकिएको हो ।
त्यसपछि खेल सुरू हुन नसकेपछि नेपाल डीएसएल मेथडका आधारमा विजयी भएको हो । यूएईका यकिन किरन रेले नटआउट १०४ रन बनाए । नेपालका सन्तोष यादव र अशोक धामीले २-२ विकेट लिएका थिए ।
यसअघि मूलपानी मैदानमा टस हारेर ब्याटिङको निम्तो पाएको नेपालले ४० ओभरमा ९ विकेट गुमाएर २०० रन बनायो । केही दिनदेखिको वर्षाका कारण मैदान चिसो भएका कारण ढिलो सुरू भएको खेल ४० ओभरमा झारिएको हो ।
नेपालका कप्तान नरेन भट्टले सबैभन्दा धेरै ६७ रन बनाए । यूएईका उद्दीश सुरीले ३ विकेट लिएका थिए ।
यस्तै अर्को खेलमा अफगानिस्तानले ओमानलाई ८ विकेटले हराएको छ । एशिया छनोटमा नेपाल, यूएईसहित अफगानिस्तान, हङकङ र ओमान सहभागी छन् । छनोटमा शीर्ष स्थानमा रहने टोली आउँदो वर्ष हुने १९ वर्षमुनिको विश्वकपमा छनोट हुनेछ ।
