पत्रकार हत्या र सञ्चार गृहमा भएको आक्रमणको विरोधमा नेपाल पत्रकार महासंघले झापासहित देशैभरी विरोध प्रदर्शन गरेको छ ।
शुक्रवार काठमाडौँमा राजावादीहरुले गरेको आन्दोलनका क्रममा हत्या गरिएका फोटो पत्रकार सुरेश रजकको हत्यारा र सञ्चारगृहमा आक्रमण गर्नेलाई कडा भन्दा कडा कारवाहीको माग गर्दै महासंघले देशैभरी विरोध गरेको हो ।
विरोध प्रर्दशनकै क्रममा नेपाल पत्रकार महासंघ झापा शाखाले पनि झापाको बिर्तामोडमा विरोध प्रदर्शन गरेको छ ।
बिर्तामोडमा भेला भएका झापाभरका पत्रकारहरुले प्रेस स्वतन्त्रको सम्मान गर, पत्रकार हत्या र सञ्चार गृह आक्रमण गर्ने लागि कडा कारवाही गर, प्रेस स्वतन्त्रता जिन्दावाद, पत्रकारको हत्यारालाई कारवाही गर, पत्रकारमाथिको आक्रमण बन्द गरलगायतका प्याले कार्डसहित नारा जुलुस गर्दै र्याली गरेका छन् ।
पत्रकारहरुको बिर्तामोडस्थित हनुमान सेन्ट्रलबाट शुरु भएको र्याली पश्चिम वान स्टप महल, इलाका प्रहरी कार्यालय जाने बाटो हुँदै मुक्ति चोकमा आएर कोषसभामा परिणत भएको थियो ।
उक्त कोणसभालाई सम्बोधन गर्दै महासंघ झापा शाखाका अध्यक्ष एकराज गिरी चैत १७ गते पत्रकारले विरोध स्वरुप कालोपट्टी बाँधेर कार्य गर्ने र चैत १८ गते प्रमुख जिल्ला अधिकारीलाई ज्ञापनपत्र बुझाउने जानकारी दिए ।
हत्या गरिएका पत्रकार रजकले न्याय नपाउन्जेल र सञ्चारगृह आक्रमण गर्नेलाई कारवाही नभएसम्म महासंघले चरणवद्ध आन्दोलन गर्ने अध्यक्ष गिरीले बताए । मानव अधिकार सञ्जाल झापाले पनि महासंघ झापाले गरेको विरोध प्रदर्शनमा ऐक्यवद्धता समेत जनाएको छ ।
कोषसभामा नेपाल पत्रकार महासंघ झापाका पूर्व अध्यक्ष कृष्ण हुमागाँई, मोहनकाजी न्यौपाने, गणेश पोखरेल, तारामणि सापकोटालगायले आ-आफ्नो धारणा राखेको कार्यक्रमको सञ्चालन महासंघ झापाका सचिव प्रदीप परियारले गरेका थिए ।
