झापाको मेचीनगर नगरपालिका वडा नं.१२ सहरेडाँगीका सञ्चारकर्मी हरिकृष्ण भण्डारीको नामको अघि अब पण्डित उपाधि थपिएको छ । भण्डारी श्रीमद्भागवतको कथावाचकको रुपमा उदाउँदै छन् ।
गुरुकुल शिक्षाबाट आफ्नो अध्ययन सुरु गरेका पण्डित भण्डारीले सानै उमेरदेखि घरको सिमानामा जोडिएको श्री माधव संस्कृत विद्याश्रममा अध्ययन गरे । प्रारम्भिक अध्ययन संस्कृतबाट सुरु गरेका भण्डारीले विज्ञानको समेत गहन अध्ययन गरी काठमाडौँस्थित बैंकटेस मन्दिरको गुरुकूलमा भागवत अध्ययन पूरा गरेका हुन् ।
उनी आध्यात्मिक परिवारमा हुर्किए । माधव संस्कृत विद्याश्रम उनकै हजुरबुवा माधवप्रसाद (साना गुरुजी) ले स्थापना गरेका हुन् । २६ वर्षीय पण्डित भण्डारी सुमधुर स्वरका धनी छन्, उनको वाककला सुन्न लायक छ । हसिलो मुहार र प्रभावशाली वाककलाले उनको कथावाचन श्रवणीय हुने बताइन्छ ।
यही फागुन ७ गतेदेखि १४ गतेसम्म सहरेडाँगीस्थित माधव संस्कृत विद्याश्रममा आयोजना हुने श्रीमद्भागवत सप्ताह एवं धनधाञ्याचल विराट् ज्ञान महायज्ञमा उनले पहिलो पटक कथावाचन गर्दै छन् ।
वि.सं.२०७१ सालमा झापाको धुलाबारी स्थित रेडियो सरगममा कार्यक्रम सञ्चालन सुरु गरेर पत्रकारितामा प्रवेश गरेका भण्डारीले करिब १० बर्षे पत्रकारिता पछि अब नयाँ गन्तब्य तय गरेका छन् ।
संस्कृतको प्रारम्भिक अध्ययन माधव संस्कृत गुरुकुलबाटै गरेका भण्डारीले विज्ञानको समेत गहन अध्ययन गरि भारतको सम्पुर्णानन्द विश्वविद्यालयमा व्याकरण विषय लिई आचार्य (स्नाकोत्तर) अध्ययनरत छन् । कुशाग्र बुद्धि भएका भण्डारीले सयौँ संघसंस्था, विद्यालय लगायत क्षेत्रमा वेद र विज्ञानलाई समेटी समन्वयात्मक उत्प्रेरणामुलक प्रशिक्षण दिई छुट्टै पहिचान समेत बनाईसकेका छन् । कथा वाचनको क्षेत्रमा समाजले नवीन पन खोजी रहेको परिप्रेक्षमा वेद र विज्ञान बुझेका भण्डारीको कथा वाचनबाट नयाँ आयाम आउने संकेत छ ।
हरेक विषयलाई विभिन्न उदाहरण प्रस्तुत गरेर बुझाउन सहज बनाउन सक्ने खुबीका कारण पनि भण्डारीलाई पुराणको कथा वाचनमा लोकप्रिय हुने उनलाई जान्नेहरु बताउँछन् । उनले आमसञ्चार र पत्रकारिता विषयमा स्नातक तहको अध्ययन समेत पूरा गरेका छन् । ध्यान र योगमा समेत गहिरो रुची राख्ने पण्डित भण्डारीले आफ्नो नयाँ यात्रामा सबैको साथ सहयोगको अपेक्षा गरेका छन् ।
