किशोरीहरुको लागि पाठेघरको मुखको क्यान्सरविरुद्धको ‘एचपिभी’ खोप अभियान बिर्तामोडमा धमाधम सञ्चालन भईरहेको छ ।
विद्यालय र विद्यालय बाहिरका किशोरीहरुका लागि माघ २२ गतेदेखि सुरु भएको यस अभियानमा खोपकर्मी र स्वयमसेवक गरि १०४ जना जनशक्ति खटिएको नगरको स्वास्थ्य शाखाले जनाएको छ ।
माघ २७ गतेसम्म सञ्चालन हुने यस अभियानमा शुक्रबार सम्मको तथ्याङ्क अनुसार ७५ प्रतिशत खोप लगाईसकिएको बिर्तामोड नगर अस्पतालका जनस्वास्थ्य निरिक्षक तथा कार्यक्रमका फोकल पर्सन गणेश रिजालले जानकारी दिए ।
बिर्तामोडमा विद्यालयका ६ हजार ४३३ र बाहिरका १ हजार १३९ गरि कुल ७ हजार ५७२ जनालाई खोप लगाइने नगरका स्वास्थ्य शाखाका प्रमुख राजिब विष्टले बताए । यसका लागि विद्यालयमा ५७ र स्वास्थ्य संस्थामा ११ वटा गरि ६८ वटा खोप केन्द्र स्थापना गरेको जनाईएको छ ।
सरकारको कार्यक्रम अनुसार विद्यालयमा अध्ययनरत कक्षा ६ देखि १० सम्म र बाहिर रहेका १० बर्षदेखि १४ वर्षसम्मका किशोरीलाई ‘एचपिभी’ खोप लगाउने कार्य सञ्चालन भईरहेको हो ।
स्वास्थ्य केन्द्रमा कुनै कारणले खोप लगाउन छुटेकाहरुलाई माघ २७ गते १० वटै वडामा रहेका स्वास्थ्य संस्थामा लगाइने स्वास्थ्य शाखा प्रमुख विष्टले जानकारी दिए ।
बिर्तामोड नगरपालिकाकी नगर प्रमुख पवित्रा महतारा प्रसाईले लक्षित समुहले खोप अनिबार्य लगाउन आग्रह गरेकी छन् ।
